Hamenus Dezempregu VIII Governu Tenke Kapasita Juventude

0
185
Sekretáriu Estadu Juventude no Traballu (SEJT), Nívio Leite Magalhães

DILI (TATOLI)— Sekretáriu Estadu Juventude no Traballu (SEJT) Nívio Magalhães husu,  oitavu (VIII) governu kontinua kapasita juventude sira nune’e bele hamenus dezempregu iha Timor-Leste.

“Governante foun iha VIII governu konstitusionál no konsidera katak iha buat barak ne’ebé presiza kontinua hala’o, liliu liga ba situasaun juventude sira nian, kapasitasaun ba juventude nu’udar esforsu ba hamenus dezempregu,” Nívio Magalhães informa ba jornalista sira iha salaun Madre Canosiana-Becora, Díli, ohin.

Iha fatin hanesan Nívio esplika, Sekretáriu Estadu Juventude no Traballu sei kontinua hala’o serbisu to’o mandatu ikus tan konsidera katak governu bele troka malu, maibé mákina estadu labele paradu.

“Ami kontinua serbisu to’o mandatu ikus katak hela de’it minutu ida mós ami sei hala’o ami-nia kna’ar hodi entrega serbisu hotu ba governante foun hodi kontinua fó atensaun ba implementa polítika nasionál juventude,” Nívio Magalhães dehan.

SEJT kontinua hala’o nia kna’ar hodi entrega serbisu hotu ba governante foun hodi kontinua fó atensaun ba implementa polítika nasionál juventude.

Nune’e mós kontinua husu ba emprezáriu sira atu kontinua apoiu juventude sira no ligadu ho traballadór sira, SEJT haree oinsá implementasaun lei traballadór nian hodi halo tratamentu di’ak ba traballadór sira iha ita-nia rain.

Inklui, haree mós oinsa estranjeiru sira mai iha ita-nia rain, liuliu ligadu ho utilizasaun vistu, turista ka traballu no mós saláriu ba traballadór timoroan sira. Ida ne’e importante tebes.

Governu tenke fó apoiu másimu ba juventude sira liuhusi prepara formasaun ho kualidade hodi sai autór prinsipál iha dezenvolvimentu nasionál.

“Tanba ida ne’e ohin ha’u fahe informasaun atu nafatin juventude kontribui ba pás, estabilidade no dezenvolvimentu nasionál,” informa Nívio, iha marjen semináriu nasionál kona-ba valoriza no habelar espíritu 20 maiu 2018, organiza husi organizasaun Kadalak.

Iha semináriu nasionál ne’e Nívio Magalhães, aprezenta kona-ba “Papél SEJT para o desenvolvimento de juventude agora e no futuro”

Bazeia ba tema ne’ebé Nivío aprezenta, nia konsidera luta ba libertasaun juventude sira kontribui mós ba luta hodi sai autór ida ba ukun rasik aan. Nune’e, husu juventude sira agora tenke kontinua sai autór maibé autór ba dezenvolvimentu.

Tanba ne’e, SEJT liuhusi apoiu ba sentru formasaun sira hodi prepara mós juventude sira ho kualidade, hodi kontribui ba pás. Nune’e mós, SEJT liuhusi fundu nasionál juventude, prepara joven sira, hodi prepara aan, prepara sira-nia kriatividade.

Inklui, sentru juventude ho karakter multi-funsaun hodi fó espasu ba joven sira atu aprende língua, teknolojia, arte, kultura no seluk tan no mós kontinua Parlamentu Foin sa’e (PF) hodi prepara foin sa’e sira dezenvolve sira-nia kapasidade ba iha futuru, hodi sai matan, tilun no ibun ba povu.

“Programa sétimu governu konstitusionál, SEJT mós nia mandatu mós sei remata; programa kontinuasaun husi sestu governu konstitusionál, nune’e hein kontinuasaun husi governu foun mai,” nia espera.

Jornalista: Rafy Belo

Editór : Manuel Pinto

HUSIK IDA HATÁN