FRETILIN Sei Harii Zona Dezenvolvimentu Aseleradu

0
130

DILI, (TATOLI) – Governu FRETILIN sei harii Zona Dezenvolvimentu Aseleradu iha Timor laran tomak bainhira manán iha eleisaun antesipada, 12 Maiu 2018.

Asuntu ne’e hato’o hosi Sekretáriu Jerál Partidu FRETILIN, Marí Alkatiri, liuhusi komísiu polítika dala ikus ne’ebé hala’o iha Tasi Tolu, kuarta ne’e.

Marí esplika Zona Dezenvolvimentu Aseleradu ne’e signifika polu dezenvolvimentu ne’ebé lori merkadu hakbesik ba populasaun iha área rurál.

“Kada Zona Dezenvolvimentu Aseleradu ne’e kompostu hosi munisípiu tolu, hanesan ezemplu, Baukau, Lautein no Vikeke sai zona dezenvolvimentu ida. Nune’e mós munisípiu sira seluk”, esplika.

Programa prioridade ne’ebé presiza aselera iha territóriu, Marí esklarese abitasaun ba povu iha rurál no urbana, harii edukasaun inkluziva, habelar atendementu saúde ho kualidade ba ema hotu, hadi’a setór agrikultura atu Timor bele iha soberania ai-han, hadi’a setór turizmu atu bele hatama reseita ba Estadu, kria kampu serbisu ba juventude, fasilita juventude ne’ebé iha artes marsiais, arte rituál, múziku sira nune’e bele eleva kapasidade juventude iha área arte no desportu.

Programa hirak ne’e, Marí afirma loloos implementa ona iha Sétimu Governu Konstitusionál maibé la konsege tanba partidu opozisaun vota kontra tiha.

Iha komísiu ba dala ikus ne’e, líder nasionál hateten la rai ódiu ba líder nasionál sira seluk iha Aliansa Mudansa ba Progresu tanba prinsípiu polítika ne’e dehan iha polítika ne’e laiha inimigu maibé adversáriu.

Komísiu ne’e partisipa hosi líder nasionál sira seluk hanesan Ramos Horta, Abílio Araújo, Julíao Alves Mausiri, reprezentante arte marsiais no rituais, reprezentante organizasaun filiadas FRETILIN, reprezentante asosiasaun múzikus timoroan no militante FRETILIN rihun ba rihun.

Jornalista: Xisto Freitas

Editora: Rita Almeida

HUSIK IDA HATÁN