DILI (TATOLI) -Partidu Fretilín, ho organizasaun Rede Feto ohin, iha Otél Luz Clarita realiza dialog ho objetivu Fretilín informa ba Rede feto ho ninia parseiru, programa Fretilín nian ba feto.
Sekretáriu Jerál Partidu Fretilín, Mari Alkatiri hateten, atividade nee hala’o tanba pedidu hosi organizasaun Feto nee.
“Ha’u labele reseita pedidu hosi sira selae sira dehan ha’u halo diskriminasaun, tanba ne’e ha’u mai ko’alia hanesan akontese mós iha 2017,” Atuál Primeiru Ministru ne’e informa iha Otél Luz Clarita, Ohin.
Fretilín, tuir Alkatiri sei kontinua polítika ida atu apoiu feto iha vida emprezariál, polítika no seluk tan.
Iha fatin hanesan Prezidente Rede Feto, Judite Dias Ximenes informa diálogu ne’e realiza la’ós tanba pedidu hosi Rede Feto, maibé OPMT, Partidu Fretilín nian mak halo pedidu ba rede feto ho objetivu ida atu rede feto rona Fretilín nia programa.
“Rede feto nia estatutu laiha partidu, maibé ema ida idak iha direitu sivíl no polítika, ” Judite dehan.
Tanba pedidu hosi OPMT, ohin rede feto ho ninia parseiru sira hanesan, feto emprezariál, feto potensiál munisípiu Dili, feto professional saúde, Edukasaun no seluk tan maka marka prezensa iha Diálogu nee.
Organizasaun hirak ne’e hola parte tanba Rede Feto durante ne’e hala’o knaar hodi fó advokasia no dezenvolvimentu ba Feto iha area saúde, edukasaun, polítika, violénsia ba jéneru no seluk tan.
Jornalista: Agapito dos Santos
Editór : Manuel Pinto
