Estudante Ekonomia UNTL Prátika Transforma Lixu

0
54
Paralon restu ne’ebé estudante sira halo sai fali laptop tuur fatin.

DILI, (TATOLI) – Estudante Universidade Nasionál Timor Lorosa’e (UNTL) na’in-haat prátika utiliza matéria plástika ka paralon restu husi kontrusaun nian hodi halo sai laptop nia tuur fatin hanesan forma ida atu kontribui redús lixu no prodús sai fali buat ida ne’ebé ema bele uza.

“Ami bá husu iha projetu boot sira ne’ebé halo konstrusaun, karik paralon restu sira ne’e fó ba ami, ami uza hodi halo fali ba laptop nia tuur fatin. Produtu ne’ebé fa’an (prontu husi fábrika) ne’e iha ona ho nia vientuiña kedan mas ami-nia uza paralon de’it, depois ami hola mak nia tutan sira ne’e no goma depois halo sai stand ba laptop”, Eugenio da Garaça Martins Fernandes, semestre hitu husi Fakuldade Ekonomia no Jestaun, Departamentu Kontabilidade hatete iha Kampus Rezende UNTL, ohin.

Ideia atu halo ida ne’e mai husi matéria ida sobre jestaun kooperativa ne’ebé mak manorin dixiplina husu atu estudante sira buka ideia foun no ema seluk seidauk halo. “Ami esforsu buka ideia barak no hetan referénsia ne’e iha internét no ami halo tuir fali”.

Eugenio hatutan sasán ne’e bainhira ema halo kontrusaun no nia rohan lauza ona maka aproveita oinsá mak bele iha valór, bele hamenus fo’er iha ambiente.

“Ami sei halo uluk iha fakuldade, depois sei haree oinsá merkadu nia responde, ema sira ne’ebé kompra karik di’ak ami esforsu prodús barak liután atubele fa’an iha fatin seluk. Atubele prodús ida ne’e lalais loos tanba ita ko’a depois hatutan no tau goma ba, se hakarak tau nia kór ita tau piloks no oras ida ho balun hanesan ne’e pontu ona”, haktuir.

Sasán ne’e baihira iha projetu boot sira uza no so’e, hanesan estudante buka referénsia husi rekursu oioin atubele halo sai buat ida útil tanba teoria aprende, nune’e prátika tenke halo atu motiva aan nomós ema seluk.

Produtu ne’ebé halo ona ne’e estudante sira fa’an ona iha feira ne’ebé organiza husi estudante UNTL, Fakuldade Ekonomia no Jestaun, departamentu kontabilidade no jestaun hodi komemora loron restauransaun independénsia Timor-Leste nia ba dala-XVI, ho espozisaun produtu lokál no resiklajen.

Kada produtu hosi paralon ne’e halo tuir tamañu laptop nia ho presu bazea ba kustu ne’ebé hasai mak ida ki’ik dólar 3.50 no boot dólar haat.

Dekanu FEJ, Fernando Baptista Anuno, hatete selebrasaun ba 20 Maiu 2018 ne’e FEK hahú ba nia prinsípiu tolu ne’ebé habelar husi universidade mai kada fakuldade mak ensinu aprendijazen, peskiza no serbisu ba komunidade, nune’e ho razaun ida ne’e hodi realiza feira.

“Katak ensinu ne’ebé estudante sira hetan, aleinde teoria aprende mós iha prátika. Ami iha departamentu haat mak jestaun, siénsia ekonomia, komérsiu no turizmu no kontabilidade. Husi departamentu haat ne’e iha anu letivu iha semestre ida ne’e departamentu jestaun hetan dixiplina ida naran jestaun marketing no kontabilidade hetan matéria empreendedorizmu. Ho dixiplina rua ne’e katak oinsá mak tenta realiza feira ida ho espíritu empreendedorizmu atu halo feira ba produtu lokál”.

Tanba fakuldade orienta atu aprende ekonomia ne’ebé ko’alia sobre negósiu mezmu aban-bainrua sira la’ós sai hanesan negosiante, maibé pelu menus ideia negósiu bele tranzmite ba ema sira ne’ebé iha osan nune’e bele investe sira-nia kapitál.

Jornalista: Maria Auxiliadora

Editora: Rita Almeida

HUSIK IDA HATÁN