Emprezáriu Rui Castro Enkoraja Joven Sira Halo Negósiu

0
134
Emprezáriu timoroan, Rui Castro

DILI, (TATOLI) – Emprezáriu nasionál, Rui Castro, enkoraja joven sira atu hala’o atividade negósiu, nune’e bele sai emprezáriu, mezmu ho fundu ne’ebé mak ki’ik, importante mak badinas no serbisu maka’as.

“Ha’u enkoraja alin sira, se hakarak bisnis, hahú ho buat ki’ik. Hahú, neneik maibé bebeik. Hetan um dolár karik, gasta 10 cent, rai 90 cent, ita hetan modal (fundu), uitoan ita la sente, maibé to’o fulan ida, rua, tinan ida rua, ita bele sente, bele sai emprezáriu ne’ebé susesu”, hateten emprezáriu Rui Castro iha salaun Madre Canosiana-Bekora, ohin.

“Ita-boot sira iha oportunidade barak, tama de’it iha google, bisnis (negósiu) hothotu iha ne’ebá. Importante uza internet sai emprezáriu, koko hahú buat ruma, maibé dalabarak ita uza de’it internet, la konsege buka liu saida mak bele halo”, nia reforsa tan.

Emprezáriu timoroan ne’e kompara katak ema seluk bele mai halo negósiu iha ita-nia rain no la moe tanba ne’e ita mós labele moe. Tanbasá ita tenke moe atu hahú buat ne’ebé loloos atu fó moris ba ita?.

“Lalika ta’uk atu sai emprezáriu! emprezáriu ne’e la susar liu, la gampang liu maibé presiza mós commitment (komprimisiu), serbisu maka’as. Sai emprezáriu labele tuur, hader mai mehi de’it sai realidade. Lae! Tenke serbisu, tenke fera kakutak! Tenke haree oportunidade ba buat seluk ne’ebé ema la halo. Bainhira ita haree buat ne’ebé mak ema la halo, ida ne’e mak oportunidade bisnis di’ak, atu hetan osan ne’ebé di’ak,” nia fó hanoin.

Emprezáriu Rui Castro akresenta katak bainhira ema ida sai husi sentru formasaun ka estudu iha buat rua ne’ebé nia hili ba nia vida; buka serbisu ou kria serbisu. Maibé, ita-nia mentalidade, ita-nia eskola sira iha Timor, barak liu ema sai husi sentru formasaun, sai husi eskola, gosta leva CV (curricúlo vitae) tuun-sa’e buka serbisu, lakohi kria serbisu. Ta’uk atu uza matenek ne’ebé nia hetan atu kria serbisu ba nia maluk sira ne’ebé mak la iha oportunidade atu eskola.

Tanba ne’e mak dalabarak ita krítiku ema seluk mai iha ita rain ho buat ne’ebé iha, tanba mentalidade ita Timor, atu hahú bisnis hahú ho buat boot. Tanba mós liga polítika governu balun, halo ema ta’uk atu hanoin, atu halo serbisu tanba gosta subsídiu, fó, halo ema lakon kreatividade.

“Dalabarak ema hanoin katak atu hahú negósiu ne’e iha osan ne’ebé boot no sempre uza razaun katak ha’u atu hahú bisnis osan mak la to’o maibé dalabarak modal ne’ebé loloos atu hahú bisnis gasta tiha ba buat seluk,” haklaken emprezáriu Rui Castro.

Nia hatutan, bainhira atu halo negósiu la presiza haree liu ba buat ne’ebé boot, hahú ho ki’ik, neneik-neneik maibé bebeik. Duke hanoin buat boot, hahú ho buat boot, monu nunka hadeer.

“Ita hahú ho ki’ik, neneik-neneik maibé bebeik depois mak monu, ita hetan esperiénsia ruma, mak monu, ne’e biasa-biasa de’it. Maibé ita hahú ho buat boot ona, kuandu monu, atu hadeer fali hahú ho ki’ik ne’e ita moe tiha ona, tanba ita nunka koko buat ki’ik. Buat boot ne’e ema hotu hakarak, ema hotu interese, buat ki’ik ne’e ema la gosta, dalaruma nia mesak de’it,” afirma emprezáriu timoroan ne’e.

Entretantu, korajen sira ne’e emprezáriu nasionál Rui Castro fó sai, no ámbitu semináriu nasionál kona-ba 20 maiu 2018, iha kualidade nia nu’udar interveniente ida ba palestra ho tópiku “As competências adquiridas pelos graduados do ensino superior correspondem às necessidades do mercado de trabalho”.

Ho partisipante husi estudante ensinu sekundáriu públiku no privada nomós ensinu superiór sira iha Díli.

Jornalista: Rafy Belo

Editora: Rita Almeida

HUSIK IDA HATÁN