Durante Oras 72, ParPol-Koligasaun Bele Kontesta Rezultadu Eleisaun

0
161
Prezidente CNE, Alcino Barris, bainhira halo konferénsia imprensa iha Kaikoli, ohin. Foto Egas Cristovão

DILI, (TATOLI) – Prezidente Komisaun ba Eleisaun (CNE-sigla portugés), Alcino Barris, hatete Partidu Polítiku (ParPol) no partidu koligasaun ne’ebé konkore iha Eleisaun Antesipada bele kontesta rezultadu sufrájiu durante oras 72 hahú ohin to’o kuarta, (16/5).

“Karik desizaun ruma sira la simu, iha 72 oras ba sira hodi bele halo rekursu ba Tribunál Rekursu (TR)”, katak Barris ba jornalista sira iha Kaikoli, ohin.

Prezidente orgaun eleitorál ne’e haktuir iha munisípiu Bobonaro, sentru ida seidauk bele fiksa tanba entre rezultadu ho sistema ne’ebé Sekretáriu Tékniku Administrasaun Eleitorál (STAE) uza la simu malu, nune’e tuir regra tenke haruka mai CNE hodi haree sei iha kazu, bele husu autorizasaun husi TR.

Barris esplika CNE no STAE halo apuramentu ho sistema diferente, maibé ho dadus hanesan ne’ebé emite iha apuramentu munisipál.

Dadus provizóriu ne’ebé fó sai iha televizaun mai husi ata kontajen kada sentru votasaun, sira konta hotu mak asina entre STAE no fiskais konkorente sira, ata ne’e mak manda ba STAE munisipál hodi sira halo apuramentu ho rezultadu provizóriu.

Ata ne’e mak haruka mai CNE hodi halo apuramentu nasionál no haruka ba TR hodi hetan apresiasaun no fiksasaun hafoin hasai rezultadu finál ba eleisaun.

Agora dadaun ata sira tama ona iha CNE hodi haree prosedimentu legál, hahú ohin (oras 72 nia laran) no iha loron ne’e konkorente sira (koligasaun no partidária) bele hato’o desizaun ruma durante halo verifikasaun no apuramentu.

Entretantu STAE konklui ona apuramentu munisipál ho rejionál, no entrega ona 885 ata husi 885 sentru votasaun iha teritóriu no diaspora ba CNE no husi ata ne’e 884 mak dizita ona no ida mak seidauk.

Prezidente CNE mos hatutan iha reklamante husi sentru votasaun. “CNE sei haruka karta ba Tribunál Rekursu hodi fó autorizasaun loke fali urna ho possivel CNE atu konta fila fali. Ida  ne’e se-kuandu iha kazu mosu mas laiha kazu labele book tanba regra tenke iha autorizasaun”, tenik nia.

Alcino Barris hatete reklamante barak mak hatama husi sentru votasaun  ne’ebé iha kontajen sira hatama kedan reklamasaun no rezultadu mak manda ba CNE atu halo apresiasaun  no desizaun.

Jornalista: Julia Chatarina

Editora: Rita Almeida

HUSIK IDA HATÁN