CNE Identifika Munisípiu 5 Nia Akta Iha Problema

0
3654
Prezidente Komisaun Nasionál Eleisaun Alcino Barris.

DILI (TATOLI) –Prosesu verifikasaun aktas Komisaun Nasionál Eleisaun (CNE-Sigla Portugés), identifika aktas hosi munisípiu,  Baucau, Bobonaro, Covalima, Dili no Ermera iha problema.

Maski nune’e ohin mós CNE konsege apura ona aktas sira hosi Munisípiu Aileu no Ainaru.

Prezidente Komisaun Nasionál Eleisaun Alcino Barris, informa apuramentu nasionál hahú iha tuku 8:00 no suspende iha tuku 24:30 konsege apura ona akta hirak hosi munisípiu Aileu no Ainaru, maibé sei pendente hela verifikasaun ba akta balun hosi Munisípiu Baucau, Bobonaro, Covalima, Dili no Ermera tanba identifika iha problema.

“CNE sei pendente apuramentu akta hirak ne’e tanba identifika problema,” Alcino Barris ba jornalista sira iha sala konferénsia, CNE Caicoli, ohin.

Problema hosi Munisípiu Baucau mak akta apuramentu munisipál iha totál votu reklamadu hamutuk 59, maibé depois CNE verifika fizikamente iha bulletin votu reklamadu hamutuk 63.

Nune’e CNE solista ona ba Sekretariadu Tékniku Administrasaun Eleitorál (STAE) Munisípiu Baucau hodi klarifika.

Nune’e mós iha Munisípiu Bobonaro, iha sentru votasaun Sede Suku Opa, iha irregularidade kona-ba prienxe akta apuramentu inisiál. Akontese diskrepánsia numérika entre totál votu válidu ho votu ne’ebé atribui ba partidu no koligasaun partidária sira.

Iha mós hosi Munisípiu Ermera, akta apuramentu munisipál nian hakerek totál votu reklamadu hamutuk 74 maibé depois CNE verifika fizikamente hetan de’it votu reklamadu iha 73. No CNE notifika ona problema ba STAE hodi justifika.

Inkluindu Munisípiu Covalima, akontese mós akta munisípiu nian hakerek totál votu reklamadu neen maibé hafoin CNE verifika fizikamente hetan de’it bulletin haat.

Haree ba problema ne’e, CNE deside pendente no solista ba Diretór STAE Covalima hodi halo klarifikasaun.

Ho problema hirak ne’ebé mak CNE identifika, CNE dirije ona karta ba Tribunál Rekursu hodi husu autorizasaun halo fali re-kontajen ba bulletin hosi sentru votasaun refere.

Enkuantu, durante apuramentu nasionál, CNE deside ona votu reklamadu hamutuk 182 hosi Munisípiu Aileu, Ainaru no Baukau. Hosi totál votu reklamadu refere, CNE deside sai nulu hamutuk 13, sai branku ida no sai válidu hamutuk 165, ne’ebé atribui ba Partidu Demokrátiku (PD), Frente Revolusionáriu Timor-Leste Independente (Fretilín) 64, Movimentu Sosiál Demokrátiku (MSD) ida, Frente Dezenvolvimentu Demokrátiku (FDD) haat no Aliansa Mudansa ba Progresu hamutuk 91.

Iha mós rekursu ba desizaun CNE nian ligadu ho validasaun votu reklamadu hamutuk tolu. Oras ne’e daudaun CNE kontinua hela prosesu apuramentu no falta hosi munisípiu neen, Rejiaun Administrativu Espesiál Oe-Cusse Ambenu inklui Diaspora nian ne’ebé CNE ladauk verifika.

Jornalista : Zezito Silva

Editór : Manuel Pinto

HUSIK IDA HATÁN