CNE Husu ParPol Halo Rekursu Kuandu La Satisfas Ho Rezultadu Apuramentu

0
196
Prezidente CNE, Alcino Barris ko'alia ho fiskais no reprejentante Partidu sira iha salaun CNE. Foto dokumentasaun Tatoli

DILI, (TATOLI) – Hafoin oras 72 a apuramentu nasionál,  Komisaun Nasionál Eleisaun (CNE-sigla portugés) ofisialmente públika rezultadu provizóriu apuramemtu ba públiku no husu ba partidu polítiku ka koligasaun partidária atu halo rekursu ba Tribunál Rekursu kuandu la satisfas ho rezultadu eleisaun antesipada parlamentár.

“Ohin, apuramentu nasionál iha CNE remata no ita públika rezultadu provizóriu ba públiku enkuantu konkorente sira la satisfas bele halo rekursu ba tribunál durante horas 48”, Prezidente CNE, Alcino Barris, ba jornalista sira liuhosi konferénsia imprensa iha CNE, ohin.

Hafoin remata rezultadu provizóriu apuramentu, haruka ba Tribunál Rekursu atu valida no pronúnsia rezultadu finál.

Nune’e, durante oras 72 ka loron tolu nia laran, CNE halo apuramentu ba ata ka votu reklamadu hirak ne’ebé mai hosi sentru votasaun ka hosi Sekretariadu Tékniku Administrasaun Eleitorál (STAE) munisípiu to’o  STAE nasionál.

Enkuantu, rezultadu provizóriu ba apuramentu nasionál CNE nian mak totál votu ne’ebé konfirmadu mak partidu Aliansa Mudansa ba Progresu (AMP) hetan votu hamutuk 309.663 (49,6%), partidu Frente Revolusinária Timor-Leste Independente (Fretilin) ho votu 213.324 (34,2%), Partidu Demokrátiku (PD) ho votu 50.370 (8,1%), partidu Frente Dezenvolvimentu Demokrátiku (FDD) hetan votu 34.301 (5,5), Partidu Esperansa Pátria (PEP) ho votu 5.060 (0,8%), partidu Movimentu Dezenvolvimentu Nasionál (MDN) ho votu 4.494 (0,7%), Partidu Repúblikanu (PR) ho votu 4.125 (0,7), Movimentu Sosiál Demokrata (MSD) ho votu 3.188 (0,5%), enkuantu ho totál hamutuk 624.525.

Nune’e, distribuisaun kadeira ba partidu ka koaligasaun partidária mak partidu AMP hetan kadeira 34, Fretilin ho kadeira 23, PD ho kadeira 5 no FDD kadeira 3.

Entretantu, totál eleitór iha eleisaun antesipada parlamentár ne’ebé rejistadu hamutuk 784.286, feto hamutuk 308.844 (48,63%) no mane 326.272 (51,37%).

Iha oportunidade ne’e, Prezidente CNE agradese ba públiku tomak liliu esforsu servisu hosi ekipa CNE ne’ebé rezulta termina apuramentu nasionál to’o nia rohan.

Jornalista: Zezito Silva

Editora: Rita Almeida

HUSIK IDA HATÁN