Alimentár Iha Same-Ermera Di’ak, Maibé Nutrisaun Seidauk

0
93

DÍLI, (TATOLI)-Rezultadu peskiza Fakuldade Agrikultura, Universidade Nasionál Timor Lorosa’e (UNTL), liliu ba munisípiu Ermera no Manufahi hatudu katak rezultadu produsaun alimentár iha munisípiu rua ne’e aumenta no iha impaktu enkuantu ba nutrisaun seidauk.

“Ne’e rezultadu husi ami-nia estudu katak ba seguransa alimentár ninia impaktu pozitivu maibé seidauk iha impaktu ba iha nutrisaun. Purtantu, mezmu produsaun ne’e aas ona através projetu konservasaun agrikultura ne’e iha agrikultór ninian aumenta maibé maioria agrikultór sira iha ne’ebá ne’e (Same-Ermera-red) seidauk,” informa peskizadór Delfim da Costa ba Ajénsia TATOLI, ohin, iha UNTL.

Rezultadu ne’e, peskizadór Delfim da Costa haktuir katak peskiza ne’ebé sira hala’o, hetan apoiu husi Organizasaun Nasaun Unida ba Agrikultura no Alimentasaun (FAO-abreviasaun ho inglés), hodi hatene impaktu ne’ebé FAO hala’o hahú iha 2013, nia impaktu ba seguransa alimentár no nutrisaun ne’e iha ka lae?

Nune’e, hafoin peskiza iha munisípiu rua ne’e deskobre katak konservasaun agrikultura, nia impaktu ba seguransa no alimentár aumenta maibé impaktu ba nutrisaun ne’e mak seidauk.

“Entaun, ita presiza, ohin ami sujere, atu ba oin tenkeser FAO ho ajénsia seluk, Ministériu Agrikultura bele integra tan projetu, familiariza nutrisaun ne’e ba agrikultór sira, atu sira bele hasa’e mós mós tasa nutrisaun iha família laran, liliu ba labarik sira,” akresenta peskizadór ne’e.

Nune’e, iha kualidade nu’udar peskizadór, akadémiku UNTL ne’e inklui nia grupu peskizadór sira akresenta katak sei rekomenda ba FAO atu tau mós konsiderasaun ba iha nutrisaun.

“Ami nu’udar peskizadór, depois ami hetan rezultadu, ami rekomenda filafali ba FAO, atu deteta, para sira integra tan projetu nutrisaun atu bele estandariza tan, habelar liutan ba munisípiu seluk no bele integra,” nia dehan.

“Signifika, la’ós de’it hasa’e produsaun maibé kria mós regra oinsá kuda aihan ne’ebé fó nutritivu di’ak liu, ba oan, feen no família,” reforsa peskizadór Delfim da Costa, iha marjen, aprezentasaun rezultadu peskiza, ne’ebé sira hala’o durante ne’e.

Enkuantu tema ba peskiza, ne’ebé  peskizadór sira ne’e hala’o no aprezenta ohin, iha UNTL mak Impaktu Konservasaun Agrikultura ba iha Seguransa Alimentár no Nutrisaun, liliu ba Agrikultór sira iha Same no Ermera.

Aprezentasaun ne’e hetan partisipasaun husi estudante UNTL sira, dosente no konvidadu onradu sira ne’ebé hala’o kna’ar no servisu iha relasaun ho agrikultura.

Jornalista: Rafy Belo

Editór : Manuel Pinto

HUSIK IDA HATÁN