Primeiru-Ministru, Marí Alkatiri, simu Prezidente KFP ho komisáriu sira iha Palásiu Governu, ohin. Foto GPM/Samuel Soares

DILI, (TATOLI) – Primeiru-Ministru, Marí Alkatiri, ohin simu relatóriu ikus hosi Prezidente Komisaun Funsaun Públika (KFP), Faustino Cardoso, kona-ba programa no atividade komisaun nian durante fulan ualu mandatu Governu dahituk nian.

Faustino Cardoso hatete durante fulan ualu Governu konsege prodús polítika no dekretu lei  balun hodi hadi’a hanesan servisu ho pontualidade, kualidade, profesionalismu no imparsialidade. Prodús mós dekretu lei ida kona-ba polítika promosaun ba funsionáriu públiku iha funsaun públika.

ʺDurante ne’e promosaun paradu hela hahú 2002 to’o agora maibe setimu governu konstitusionál nia apoiu hodi aprova dekretu lei ne’e no públika ona hodi hein prosesu implementasaunʺ, hateten Prezidente KFP iha Palásiu Governu.

Polítika promosaun ne’e sei implementa iha 2019 bainhira Parlamentu Nasionál aprova ona Orsamentu Jerál Estadu foun.

Tuir Prezidente KFP promosaun ne’e importante motiva funsionáriu públiku atu servisu ho kualidade, profesionalismu, hodi serbí administrasaun públika.

Hasoru malu ne’e, Prezidente KFP ho estrutura agradese ba Xefe Ezekutivu nomós estrutura governu tanba apoiu ona komisaun durante fulan ualu hodi hadi’a administrasaun públika.

Nune’e mós promete sei apoiu governasaun da-ualu hodi hadi’a di’ak liután Funsaun Públika iha tinan lima.

ʺKomisaun sei servisu nafatin ho governasaun da-ualu, tanba Xefe Governu maka sei fó orientasaun no pólitika hodi aselera prosesu dezenvolvimentu iha funsaun públika”, realsa.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here