Prezidenti KFP, Faustino Cardoso.

DILI, (TATOLI) – Prezidente Komisaun Funsaun Públika (KFP), Faustino Cardoso, hateten komisaun sei hala’o atividade la’o ain tuir ain fatin saudozu Sahe (Vicente Manuel Reis) hodi komemora loron funsaun públika iha 15 fulan-jullu 2018.

“La’o ain ne’e sei hala’o iha loron 19 juñu 2018, la’o ain hahú hosi postu administrativu Natarbora to’o postu administrativu Alas, munisípiu Manufahiʺ, dehan Faustino Cardoso ba jornalista sira iha Palásiu Governu, ohin.

Faustino Cardoso hatutan atividade ne’e hodi hatene  kle’an liu kona-ba lala’ok ba prosesu luta saudozu nian ba libertasaun nasionál.

KFP no funsionáriu sira hosi instituisaun Estadu 20 resin hala’o ona atividade la’o tuir ain fatin saudozu Nicolau Lobato hosi postu administrativu Soibada to’o Same, munisípiu Manufahi.

Komemorasaun tinan ne’e sei fó mós prémiu ba funsionáriu públiku ne’ebé iha prestasaun di’ak, kompetisaun desportu, muzika no seluktán.

Governu dekreta loron nasionál funsaun públika bazea ba rezolusaun Governu númeru 22/2015 fulan-jullu 2015 ho objetivu fó omanajen no rekoñese méritu funsionáriu ne’ebé servisu harii Estadu no dezenvolvimentu instituisaun atu alkansa sosiadade ida justu liután.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here