Ministra Solidariedade Sosiál (MSS), Florentina Smith. Foto António Goncalves

DILI, (TATOLI) – Governu liuhosi Ministériu Solidariedade no Sosiál (MSS) lansa livru kona-ba dezafiu no rekomendasaun sira ba estensaun protesaun sosiál iha Timor-Leste nu’udar matadalan atu hadi’a kualidade moris povu nian.

“Ami halo lansamentu livru ida kona-ba protesaun sosiál, livru ne’e bele sai referénsia, nune’e governu foun mai bele hadi’a di’ak liután povu nia moris iha Timor-Leste”, Ministra Solidariedade no Sosiál, Florentina Smith, ba jornalista sira iha Kaikoli, ohin.

Ministra haktuir governu halo ona servisu di’ak tebes, hahú hosi 2016 to’o 2018 ne’ebé identifika dezafiu sira hanesan iha área sosiál, edukasaun, bolsa da mãe, merenda eskolár no seluk-tan ne’ebé relasaun ho protesaun sosiál.

Dezafiu hirak ne’e, governu foun mai presiza hadi’a kualidade liuhosi edukasaun, saúde, no bolsa da mãe nia persentajen seidauk tuir ita hotu nia hakarak, signifika mellhora di’ak liu tan inklui merenda eskolár ho nia kualidade to’o ona iha ne’ebé, hirak ne’e hanesan ezemplu hodi tau atensaun atu hadi’a nafatin kualidade protesaun sosiál.

Enkuantu, polítika protesaun sosiál to’o agora la’o ona maibé sei iha nafatin lamentasaun hirak kona-ba atendimentu ne’ebé seidauk di’ak, nune’e mós iha hanoin katak subsidiu ne’e presiza aumenta.

Hosi identifikasaun lakuna sira, livru ne’e sai ona referénsia, entaun ba oin oinsá mak Timor-Leste bele hadi’a kondisaun moris povu nian iha relasaun ho protesaun sosiál.

Entretantu, serimónia lansamentu livru hetan partisipasaun hosi parseiru internasionál sira hanesan organizasaun Nasoen Unida (UN), Embaixada Portugal iha Timor-Leste, Internasionál Labour Organization (ILO) inklui instituisaun relevante sira seluk.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here