Xefe Unidade Misaun no Reprezentante Estadu, João Mendes Gonçalves. Foto Espesiál.

DILI, (TATOLI) – Xefe Unidade Misaun no Reprezentante Estadu, João Gonçalves, hatete Timor-Leste potensiál boot ba setór turizmu, maibé rekursu umanu seidauk orientadu ba área turizmu liuliu prestasaun serbisu iha ospitalidade.

Reprezentate Estadu iha unidade misaun triángulu entre Timor-Leste, Austrália no Indonézia ne’e dehan bainhira turizmu Timor-Leste dezenvolve ho di’ak maka husi setór ne’e de’it bele hatama osan ba país nu’udar rendimentu ba nasaun ne’e hodi Estadu bele sai autosufisiente.

“Só ke ita tenke prepara kondisaun, importante liu mak ita-nia infraestrutura, rekursu umanu. Agora, ita-nia ema seidauk orientadu ba área turizmu”, eis governante ne’e katak ohin, iha Fatuhada, Dili.

Nune’e liuhusi reuniaun trilaterál entre Timor-Leste, Austrália no Indonézia sempre ko’alia asuntu ne’e no Governu Territóriu Norte (Austrália) iha institutu vokasionál iha Alice Springs ne’ebé iha ligasaun ba Universidade Darwin prontu atu simu estudante ou ema sira ne’ebé mak hakarak bá estuda.

“Kestaun sira ne’e ami entrega ba Ministériu Edukasaun no SEPFOPE tanba ne’e sira-nia responsabilidade no ami buka dalan tanba ami-nia serbisu mak ne’e no Indonézia mós prontu atu simu ita-nia estudante hodi fó formasaun iha área ospitalidade turizmu liuliu iha Bali fatin ida ne’ebé mak orientadu duni ba turizmu”.

Hatutan tan: “Turista lubuk ida mak bá no ema sira iha ne’ebá fó prestasaun serbisu ne’ebé di’ak, buat sira ne’e mak importante ba ita-nia turizmu”.

Eis ministru Ekonomia no Dezenvolvimentu ne’e hatutan Timór presiza investe iha área formasaun no preparasaun rekursu ba turizmu nian.

“Ida ne’e importante tebes no planu ida ne’ebé mak Ministériu Turizmu presiza atu prepara no koordenasaun ho SEPFOPE. Iha rai-laran iha ona eskola ospitalidade turizmu balun, ita tenke haree saida mak eskola ne’e bele halo ona no saida tan mak Governu bele tulun atu eskola ne’e aumenta tan nia área serbisu, tanba turizmu ne’e la’ós ema tein, serbisu iha otél, maibé presiza iha tourist guide sira atu lori turista ba fatin-fatin no travel tour sira presiza prepara sira-nia ema”.

Timor-Leste iha forsa boot ba turizmu iha buat oioin, hanesan tasi, foho, kulturál, istóriku, gastronomia (hahán Timór), relijiozu no seluk tan.

“Ne’ebé mai tenta atu halo tour turizmu turista nian ida ne’ebé mak haree fatin potensiál sira. Tour ne’e atu hahú husi Indonésia-Kupan mai husi fronteira tama mai Dili, depois bá fali Darwin. Ami iha hela planu ida atu kontaktu ho instituisaun governamentál nian para depois ita entrega ba setór privadu tanba sira nia serbisu”.

Governu iha atu harii no kria kondisaun, maibé parseiru importante mak setór privadu. “Tanba ida ne’e mak iha mós ami-nia planu asaun enkontru regulár ne’ebé bolu business forum entre emprezáriu husi Timor-Leste, Indonézia no Territóriu Norte nian”.

Nia dehan reuniaun ikus propoen ona prósimu business forum ne’e sei halo iha Timór iha tinan ne’e.

Forum ne’e halo ona dala ida iha país ne’e liuhusi serbisu hamutuk ho Kámara Komérsiu Indústria Timor-Leste no tuirmai ne’e sei nafatin ho sira.

Jornalista: Maria Auxiliadora

Editora: Rita Almeida

1 KOMENTÁRIU

HAKEREK NO HATÁN

Please enter your comment!
Please enter your name here