Embaixadór Repúblika Indonézia ba Timor Leste, Sahat Sitorus, hala’o enkontru ho Prezidente Repúblika, Francisco Guterres Lú Olo no aumezmu tempu entrega karta konvite hosi Prezidente Repúblika Indonézia, Jokowi, ba Lú Olo atu hala’o vizita traballu ba Indonézia. Imajen Mídia PR.

DILI, (TATOLI) – Embaixadór Repúblika Indonézia ba Timor-Leste, Sahat Sitorus, hasoru Prezidente Repúblika, Francisco Guterres Lú Olo, hodi entrega karta konvite hosi Prezidente Repúblika Indonézia, Joko Widodo (Jokowi).

“Ha’u kontente tebes hasoru Prezidente Repúblika hodi hato’o karta konvite hosi Prezidente Repúblika Indonézia, Joko Widodo, hodi hala’o vizita Estadu ba Indonézia, fulan oin (juñu)”, Sitorus ba jornalista sira iha Palásiu Prezidente Nicolau Lobato, Bairru Pité, tersa ne’e.

Enkontru ne’e Sitorus haktuir toka asuntu importante sira ne’ebé maka sei ko’alia entre Prezidente Repúblika ho ministru sira iha Jakarta, liuliu oinsá hametin liután amizade entre nasaun rua.

“Ita sei ko’alia formatu kooperasaun ne’ebé maka atu hala’o ba oin sai di’ak liután, tanba rai rua hanesan maun-alin maske diferensa istória no prefere hakat ba oin liuhusi koperasaun ne’ebé di’ak liu”, tenik Sitorus.

Ba kestaun ne’e Prezidente Repúblika, Francisco Guterres Lú Olo, orgullu tanba hafoin simu pose iha 20 maiu 2017, Prezidente Indonézia Jokowi pesoalmente hato’o konvite ba Xefe Estadu Timor-Leste via-telefone, hodi hala’o vizita Estadu ba Indonézia, maibé tanba iha tempu ne’ebá mosu impase polítika entaun la konsege.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here