Ministru Turizmu (MT), Manuel Vong. Foto Tatoli/Egas Cristovao.

DILI, (TATOLI) – Ministru Turizmu, Manuel Vong, sujere ba governu foun atu toma atensaun ba área potensiál sira hanesan turizmu relijiozu, kultura, istóriku, ekolójiku, desportu no konvensaun ho konferénsia sira.

“Ita iha potensiál turístika ida boot, tanba ne’e presiza institusionaliza turizmu, hametin regulamentu, proteze interese komunidade, traballadór no investidór sira, hari autoridade nasionál turizmu para jere indústria turizmu no seluk tan”, hateten ministru bainhira akompaña hosi vise-ministru,  Rui Menezes, hodi agredese ba Primeiru-Ministru, Marí Alkatiri, iha Palásiu Governu, ohin.

Tuir Planu Estratéjiku Dezenvolvimentu Nasionál (PEDN) 2011 to’o 2030  bele atrai turista estranjeiru vizita TL hosi  rihun 200 to’o 500.

“Ministru foun bele prepara kondisaun nomos  operadores turístiku, liliu emprendores turístiku Timor-Leste nian atu prepara-án”, hatutan.

Manuel Vong hatutan tan atu atinje objetivu ne’e presiza kria kondisaun infraestutura bázika, aeroportu, portu, estrada, ponte, ospitalidade, ótel no seluktán.

Tuir nia, alende PEDN ba sétor turizmu 2011 to’o 2030, Governu dahituk liuhosi Ministériu Turizmu prodús ona manuál polítika dezenvolvimentu sustentavel setór turizmu 2017 to’o 2030 hodi rai ba Governu foun.

Governante esplika durante ukun fulan ualu, ministériu konsege kria sentru informasaun turístika, programa vizita Timor-Leste 2030, koperativa turistika komunitária iha Zona Espesiál.

“Loroloron ema estranjeiru sira sempre vizita sentru informasaun turizmu hodi husu informasaun, liliu pontensiál turizmu, destinasaun turístika tan brosura iha ne’eba hotu ona”, realsa.

Ministru mós hatutan presiza kria ajénsia viajen hodi fasilita turista sira bainhira vizita rai laran.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here