Foto Espesial

DILI (TATOLI)—Sekretaria Ezekutivu Komisaun Funsaun Públika (CFP-Sigla Portugés), Maria de Jesus Sarmento observa durante ne’e iha diskriminasaun ba promosaun funsionáriu públiku. Funsionáriu Munisípiu sira la hetan oportunidade, kompara ho funsionáriu sira iha Kapitál (Dili-red)

“Funsionáriu Públiku iha Dili de’it mak hetan promosaun tanba sira mak kaer diretamente prosesu ne’e, nune’e halo munisípiu sira la hetan tanba vaga limitadu, ne’e konsidera diskriminasaun,” Maria de Jesus Sarmento ba jornalista sira hafoin abertura ba seremonia fahe informasaun kona-bá dekretu lei promosaun ba funsionáriu públiku iha Salaun Ministériu Solidariedade Sosiál (MSS), ohin.

Tuir nia haree vaga ba promosaun ne’ebé durante ne’e Komisaun Funsaun Públiku (KFP), promove so iha de’it “Um Terço de Vaga” tanba ne’e la kobre funsionáriu barak tantu hosi nasionál no munisípiu.

Problema seluk, jestaun promosaun mak ladún di’ak, tanba ne’e ikus mai, funsionáriu sira hosi munisípiu mak sai vitima.

Ho problema hirak ne’e, KFP hakarak desentraliza prosesu ne’e atu halo dala ida ba funsionáriu hotu atu bele hetan oportunidade.

“Ami sente katak kuandu funsionáriu sira munisípiu la hetan ne’e konsidera diskriminasaun tanba ne’e ami hamosu lei foun atu bele konsidera ema funsionáriu hotu,” hatutan.

KFP divulga dekretu lei ida kona-ba promosaun funsionáriu públiku tanba foin mak vigor iha fulan Janeiru liu ba.

Importante tebes ba fahe informasaun lei foun ba funsionáriu sira iha instituisaun Estadu hotu atu sira bele iha koñesimentu.

Enkuantu, asaun divulgasaun lei ne’e ba ministériu hotu tanba dala ruma funsionáriu públiku la hetan informasaun ho razaun servisu barak atu lé lejizlasaun sira maibé devér sira nian tenke buka rasik.

Entretantu, divulgasaun lei ba promosaun funsionáriu públiku hala’o durante loron rua iha Salaun MSS, Ohin no Aban no hetan partisipasaun hosi funsionáriu MSS.

Funsionáriu Kontratadu Aumenta 5.000 Iha Tinan 3 Laran

Sekretaria Ezekutivu Komisaun Funsaun Públiku-KFP, Maria de Jesus Sarmento informa iha tinan 2016, KFP rejista funsionáriu kontratadu hamutuk 5.000, durante tinan 2016-2018, funsionáriu kontratadu iha ema na’in 10.000.

“KFP identifika hotu ona funsionáriu kontratadu hamutuk 5.000 resin no halo ona diagnoza iha 2016, maibé daudaun ne’e aumenta tan no kuaze 10.000, enkuantu la konta ho sira ne’ebé liuhosi bem servisu ne’ebé hanaran kazuál.” Maria de Jesus Sarmento informa.

“Atu hanaruk ka kontinua funsionáriu kontratu, ita tenke hadi’a agora, tanba ne’e iha ona diagnóstika depois hadi’a forsa traballu no kria planeamentu hafoin bele responde funsionáriu kontratadu kuaze 10.000 ne’e oinsá.”

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here