Foto/Google.

DILI, (TATOLI)- Diresaun Nasionál Kooperativa Mikro no Pekena Empreza, Ministériu Komérsiu no Indústria (MKI) daudaun ne’e halo hela serbisu diagnóstiku kooperativa iha territóriu laran no iha ministériu interligadu atu hetan ideia ruma, atubele hadi’ak kooperativa iha Timor-Leste.

Diretór Nasionál Kooperativa Mikro no Pekena Empreza, Reinaldo Borges, dehan diagnóstika ida ne’e halo husi konsultór na’in rua husi Indonézia no Brazíl atubele hetan rekomendasaun ruma sobre kooperativa ne’ebé lala’o ne’e kauza husi saida no saida mak tenke halo atu dezenvolve liután kooperativa ne’ebé iha tiha ona.

“Sira sei rekomenda mai ministériu ida ne’e para futuru saida mak tenke halo. Bainhira Governu daualuk forma ita iha ona reseita ida atu hato’o katak tuir espesialista haree katak ita tenke la’o hanesan ne’e para futuru bele hadi’a di’ak liután. Ida ne’ebé iha ita hadi’a no ida ne’ebé seidauk ita bele hamoris liután”, Reinaldo katak iha Bebora, ohin.

Diagnóstiku ne’e sei aprezenta iha 7 jullu 2018 ne’ebé monu loos iha loron internasionál kooperativa nian sobre rekomendasaun importante saida mak sei hato’o ba Governu.

“Depois diagnóstika ida ne’e ba futuru ita tenke hanoin ona, oinsá mak ita prepara atu hadi’ak kooperativa ne’e tenke iha matadalan, signifika rezultadu diagnóstiku ne’e atu rekomenda mai ita para prepara polítika kooperativa, lei kooperativa no lei lisensiamentu”.

Reinaldo fó sai rezultadu balun ne’ebé husu katak Timor-Leste tenke bá ona iha setór reál. “Signifika katak ita tenke hadi’ak ona moris ne’e oinsá mak ema ne’e partisipa mós tanba ita labele haree Xina maka mai loke loja boot sira, nu’usá mak kooperativa la envolve iha laran, oinsá mak ema seluk bele ka’er projetu, kooperativa labele envolve, ida ne’e sira sei rekomeda mai ita para kooperativa mós partisipa iha atividade hanesan ne’e”.

Kooperativa ne’ebé eziste iha Timor-Leste hamutuk 191 husi ramu neen mak kréditu uniaun, multi sektorál, agrikultura, peska, pekuária no indústria, maibé balun la la’o tanba iha problema ho rekursu umanu, ekipamentu no kapitál.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here