Ministériu Negósiu Estranjeiru no Kooperasaun (MNEK). Foto: MNEK

DILI, (TATOLI) – Ministériu Negósiu Estranjeiru no Kooperasaun (MNEK) hala’o formasaun diplomasia ba diplomata júnior na’in 23 hodi prepara ba futuru.

“Prepara futuru diplomata sira ne’e. Sira bele preparadu hodi enfrenta serbisu ne’ebé mak sira iha”, haktuir sekretáriu jerál MNEK, Antonito de Araújo, ba jornalista sira iha salaun MNEK Praia dos Coqueiros, ohin.

Sekretáriu ne’e hatutan formasaun hanesan hala’o ona ba diplomata seniór na’in 25 iha marsu. Klasifikasaun diplomata sira ne’e, balun liña diplomátika nomós téknika administrativa.

Formadora ba formasaun, Dina Wisnu, profesora asosiada ba relasaun internasionál husi Indonézia, hateten durante formasaun sei hala’o prátika kona-ba abilidade diplomasia, tékniku prátiku halo diplomásia, espesifikamente kona-ba kestaun seguransa.

“Ita sei hahú husi prinsípiu báziku diplomasia ninian, regulamentu no regulasaun internasionál no norma sira kona-ba diplomásia”, katak Dina Wisnu.

Nune’e mós, tékniku sira prepara diskursu, dokumentu internasionál, protokolu nomós sei hala’o treinamentu simulasaun kona-ba protokolu.

Dina Wisnu espera hafoin formasaun ekipa MNEK nian sei forte liután. “Prinsipál iha diplomásia mak aprende kona-ba arte, tan ne’e presiza kumprende”, konklui péritu husi Sinergy Policy, Indonéza ne’e.

Formasaun ne’e hetan apoiu orsamentu husi Fundu Dezenvolvimentu Kapitál Umanu (FDCH-sigla iha portugés). Antes ne’e FDCH apoiu ona osan ba MNEK ho valór $7.650,00.

Sekretáriu Ezekutivu FDCH, Isménio Martins da silva, konsidera hanesan privilejiu bainhira serbisu hamutuk ho MNEK atu reforsa liutan kapasidade diplomata sira nian.

“Orsamentu ne’ebé FDCH aloka hodi apoiu formasaun ne’e ho montante $7.650,00 através instituisaun synergy policy, serbisu ho embaixada Repúblika Indonézia iha ne’e, ita konvida formadora mai husi Indonézia”, dehan Isménio.

Ministru Negósiu Estranjeiru no Kooperasaun, Aurélio Guterres, apresia no agradese apoiu ne’ebé FDCH oferese hodi realiza formasaun ba diplomata sira, atu mellora liutan sira-nia koñesimentu.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here