Tratór. Foto google

DILI, (TATOLI) – Diretór Nasionál Agrikultura Ortikultura no Estensaun, Amaro Ximenes, hatete Ministériu Agrikultura no Peska (MAP) seidauk hatan ba ezijénsia agrikultór natar Irabere ne’ebé presiza tebes apoiu tratór  tanba Orsamentu Jerál Estadu 2017 ba ministériu tun liu porsentu 50.

“Entaun ita labele kobre atu sosa ekipamentu hotu, ministériu hatene orsamentu la sufisiente atu kobre, mas fiar katak bá oin ho Governu foun bele sosa”, Amaro katak iha Komoro, ohin.

Nia relata hahú fevereiru ministériu mós hasoru problema tratór boot ne’ebé aloka ona ba kada munisípiu, dalaruma labele fila rai tanba kompañia ne’ebé manán konkursu públiku atu supplay mina ba polítika fila rai gratuita lá konsege.

“Ida ne’e hanesan difikuldade ida ne’ebé ami tékniku sira hasoru, ami tenta bebeik maibé to’o agora kompañia seidauk fó”.

Iha parte seluk iha tratór balun ne’ebé aat, maibé la’ós aat liu, mas labele halo operasaun tanba laiha kustu ba manutensaun. “Ita hatene sistema orsamentu ministériu propoin tinan ida dala ida, manutensaun la’o hotu no di’ak, bainhira fila rai depois mak tohar, tenke para hein tinan seluk mak bele hadi’a”.

Hatutan tan: “Situasaun ne’e mak ami enfrenta, mas manutensaun konsege la’o no tratór barak mak ami hadi’a, só ida de’it unidade 30 mak kondisaun labele ona no ami submete leilaun ba ema sé de’it mak hakarak atu leilaun”.

Sobre ferramenta agrikultór ne’ebé doasaun husi Xina no daudaun iha hela MAP mós seidauk bele distribui tanba mínimu iha osan, maski ministériu iha ona lista ba distribuisaun no foin mak entrega tratór rua ba grupu agrikultór Atabae no Maubise.

Bainhira iha ona orsamentu, materiál sira ne’e sei aloka ba programa ne’ebé ministériu hanoin hela mak agrikultura integradu hodi apoia ne’ebá no ba fatin importante sira ne’ebé iha área ka natar (hiban) boot hanesan Manatutu, Natarbora, Oebaba, Vemasi, Laleia no Raibere iha Ainaru.

Entantu Administradór Postu Administrativu Iliomar, João Baptista Ruas, foin lalais ne’e hato’o preokupasaun agrikultura natar Irabere ne’ebé presiza halo natar boot ho tulun husi tratór rua no manuál haat ka lima.

“Natar boot lahalimar, koitadu nein tratór ida iha. Sira aprezenta kestaun dehan loloos ami halo hotu, mas komu forsa lato’o, se tratór ruma iha karik ami halai hotu natar boot ne’e”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here