Primeiru-Ministru, bainhira lansa helikópteru patrullamentu iha aeroportu internasionál Nicolau Lobato, Komoro, ohin. Foto Agapito dos Santos

DILI, (TATOLI) – Kompañia Aéru Dili oferese helikópteru patrullamentu ida ho marka 4W-FAT ba FALINTIL-Forsa Defesa Timor-Leste (F-FDTL) hodi hala’o seguransa aéru iha tetoritóriu.

“Ha’u bolu atensaun, ita simu di’ak ona maibé prepara-án atu halo manutensaunʺ, hateten Primeiru-Ministru, Marí Alkatiri, bainhira lansa helikópteru ne’e iha aeroportu internasionál Nicolau Lobato, Komoro, ohin.

Xefe Governu fó atensaun ba polítiku sira atu haree kestaun manutensaun. Hodi hatutan ho apoiu ne’e, instituisaun F-FDTL hakat pasu ida hodi dezenvolve di’ak liután kapasidade timoroan iha área pilotu.

ʺPilotu ne’e ninia promosaun maihosi oras nia semo, kuandu semo to’o oras rihun ida, nia sai kapitaun onaʺ, katak.

Área tasi luan liu rai-maran, tanba ne’e presiza tan helikópteru hodi reforsa patrulamentu áeru ne’ebé iha ona.

Xefe Gabinete, Xefe Estadu Maior Forsa Armada, Tenente Koronel Haksolok, hateten apresia ho apoiu ne’e hodi dezenvolve instituisaun forsa ne’e, liliu iha aéru.

ʺAmi iha rekursu umanu atu lori aviaun ne’e, tanba sira ba treinu ona pilotu iha Maláziaʺ, dehan. Hatutan tan: ʺAviaun ida ne’e seidauk sufisiente, tanba ida ne’e primeiraves, aviaun ne’e maka atu kria komponente aéruʺ.

Tenente Koronel Haksolok sujere ba governu foun atu toma atensaun.

Kapitaun nain tolu hosi F-FDTL maka sei lori helikópteru ne’e kompostu hosi Tenente Aleixo Verdial Almeida, Alferes Narciso Correia Silva no Sarjentu Antonio Duarte Soares.

 Sosa Ho Osan Rasik

Diretór Kompañia Áero Dili, Lorenço de Oliveira. Foto Agapito dos Santos

Diretór Kompañia Áero Dili, Lorenço de Oliveira, hateten apoiu ne’e atu hamenus Nasaun ninia problema.

ʺSosa aviaun ne’e ho osan ha’u nia rasik, la uza ema seluk nianʺ, katak emprezáriu timoroan ne’e ba jornalista sira iha aeroportu Nicolau Lobato, ohin.

Nain ba Kompañia Áero ne’e dehan la’ós tanba riku maka sosa helikópteru ba F-FDTL, maibé hatan ba Nasaun ninia nesesidade hodi kontrola ketan-rai no tasi.

ʺHa’u oferese aviaun ne’e la’ós tanba ha’u osan iha, mas tanba ha’u haree Maun Xanana asina fronteira marítima, ita iha netik aviaun ida para halo patrullamentu”, afirma.

Hodi hatutan husu ba instituisaun forsa atu uza ho responsabilidade. ʺSai pilotu la’ós overconfidence, maibé tenke teliti, pasensia, check (verifika) buat hotu antes semo no kuidadu aviaun ne’e atu nafatin dura hodi apoiu servisuʺ, apela.

Kompañia ne’e sei kontinua apoiu manutensaun ba durante tinan rua. ʺAmi sei fó manutensaun durante tinan rua no sei prepara forsa nia ema molok entregaʺ.

Helikópteru ne’e sosa hosi Estadu Unidu Amerika.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here