Sekretáriu Estadu Komunikasaun Sosiál (SEKOMS), Matias Boavida

DILI (TATOLI)-Sekretáriu Estadu Komunikasaun Sosiál (SEKOMS), Matias Boavida, informa durante nia mandatu, programa la liu iha Parlamentu Nasionál (PN), nune’e kontinua de’it programa governu anteriór nian. Maibé, ema no governu bele troka malu, estadu nafatin tanba estadu ne’e aas liu.

“Ema bele troka ohin, aban, bainrua, maibé estadu ne’e tenke kontinua. Para kontinua, ami iha teoria ida katak a continuação, a dignidade de estado sempre pôr acima de tudo (kontinuasaun, dignidade estadu sempre tau aas liu buat hotu-red). Mezmu hela de’it loron ida, se de’it mak atu mai; susesór, tenke defende dignidade do próprio estado ne’ebé mak nia anteriór hala’o ona,” hateten SEKOMS, Matias Boavida ba jornalista sira, iha otél Vila Verde, ohin.

“Depois sai hanesan lia menon di’ak ida para depois ita bele hala’o kna’ar liután nu’udar servidór estadu. Ita la’ós serbi partidu, nein ema ida, ema rua, maibé nu’udar ajente estadu garante o bem do estado e o povo,” reforsa tan governante ne’e.

Sekretáriu Estadu Matias Boavida mós akresenta katak hala’o nia misaun no konklui de’it iha fulan walu nia laran maibé sente feliz (kontente), no hala’o kna’ar tuir mandatu ne’ebé mak fó ba nia. Misaun kumprida.

Nune’e nu’udar jerasaun foun, sei kontribui ba prosesu dezenvolvimentu nasaun nian, liuhusi edukasaun, tan antes ne’e, nu’udar profesór universitáriu, no hala’o nafatin kna’ar ida ne’e, mezmu hanesan governante iha daudaun ne’e.

“Ha’u antes ne’e profesór universidade, mezmu ha’u hala’o ha’u-nia kna’ar hanesan sekretáriu estadu konsellu ministru no komunikasaun sosiál, maibé iha ha’u-nia vida loroloron, mezmu durante semestre ida ne’e ha’u sempre iha ha’u-nia aula no nunka falta ha’u-nia aula mós,” konklui SEKOMS, Matias Boavida.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here