DILI, (TATOLI) – Primeiru-Ministru (PM), Marí Alkatiri, hateten prepara ona relatóriu servisu Governasaun da-hituk hodi entrega ba Governu foun antes termina mandatu iha tempu besik.
ʺEstadu ne’e kontinuidade, governu bele mai foun, tanba ne’e governu atu sai tenke prepara kondisaun para governu foun bele kontinuaʺ, hateten Xefe Governu hafoin enkontru semenál ho Prezidente Repúblika, Francisco Guterres Lú Olo, iha Palasiu Prezidensiál Bairru Pité, ohin.
Alkatiri haktuir Governu fó ona orientasaun ba membru governu sira hodi prepara mós relatóriu atu entrega ba ezekutivu foun.
ʺSira (membru governu) seidauk hatama hotu relátoriu ba ha’u, maibé sira tenke prepara hodi entrega ba subtituisaunʺ, realsa.
Alkatiri hateten durante governu dahituk ninia ukun, orsamentu maka sai obstaklu hodi dezenvolve ekonomia rai laran.
Jornalista: Agapito dos Santos
Editora: Rita Almeida