Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur.

DILI (TATOLI)—Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur hateten Governu sei promove koronél na’in haat (4) ba brigadeiru jenerál iha tempu badak nu’udar aktu rekoñesementu ida.

Koronél na’in haat ne’ebé sei promove ba Brigadeiru jenerál mak hanesan, Koronél João Miranda “Aluc”, Koronél Américo Ximenes “Sabica”, Koronél Cornélio Ximenes “Maunana” no Koronél Domingos Raul “Falur Rate Laek.

Bainhira sai hanesan Brigadeiru jenerál, sira mak sei lidera Komponente Naval, Komponente Terrestre, Komponente Apoiu Serbisu no Komponente Formasaun no Terrenu. Tuir Governu nia orden hafoin pasa prosesu avaliasaun kompeténsia. 

“Promosaun ne’e la’ós tanba sira maka matenek liu ka hasai kursu jenerál, maibé aktu rekuñesementu hosi ita nia Governu ba ema sira ne’e tanba sira fó sira nia kontribuisaun maka’as ba funu libertasaun nasionál,” Jenerál Fitun rua hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, hafoin enkontru ho Xefe Estadu, Francisco Guterres Lú Olo, kona-ba situasaun Forsa Armada.

Nia haktuir, koronél na’in 4 ne’e la’ós ema kualker, maibé iha tempu rezisténsia komanda ema ho armada, barani, impoin dixiplina no konsege lori gerrilleiru lubuk no komunidade hodi asiste ukun rasik an.

Sira na’in haat sei promove ba Brigadeiru jenerál, maibé nomeasaun ne’e seidauk bele realiza tanba Prezidente Repúblika seidauk konvoka reuniaun Konsellu Superiór Defeza no Seguransa hodi konsulta membru Konsellu Superiór Defeza no Seguransa nia hanoin.

“Parese iha segunda semana oin, Prezidente Repúblika sei konvoka reuniaun Konsellu Superiór Defeza no Seguransa,” nia tenik.

Lere husu ba superiór F-FDTL sira seluk ne’ebé seidauk hetan promosaun ba jenerál atu labele preokupa ho promosaun ne’e, maibé hotu-hotu tenke esforsu liu-liu hasai kursu jenerál para bele sai jenerál iha tempu ruma.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here