Sekretáriu Estadu Juventude no Traballu (SEJT), Nívio Leite Magalhães. Foto/Egas Cristóvão.

BALIBO, (TATOLI) – Sekretáriu Estadu Juventude no Traballu (SEJT), Nívio Magalhaẽs, hateten oras ne’e prepara ona relatóriu servisu durante governasaun da-hitu hodi entrega ba Governu foun ne’ebé sei asume kargu iha SEJT.

“Ha’u prepara ona nota entrega ba governu foun atu kontinua implementa servisu sira ne’ebé durante ne’e hala’o ona, liliu joventude bele sente ukun rasik-án”, dehan governante ne’e ba Tatoli iha postu administrativu Balibo, munisípiu Bobonaru, domingu ne’e.

Tuir nia relatóriu ne’e oinsá husu Governu foun atu kontinua servisu hanesan kria formasaun professionál ba joven sira, proteje diretu traballadór timoroan no seluktán.

Bainhira joventude iha kapasidade hodi emprega-án iha servisu, sei hamenus dezempregu no hadi’a ekonomia família, dehan Nívio.

Governante ne’e dehan maske mandatu termina maibé sei kontinua apoiu hodi hala’o dezenvolvimento iha rai laran. “Politika sira bele troka malu, maibé objetivu ida de’it, lori povu ba moris di’ak”.

Sekrétariu Estadu ba Foinsa’e sira ne’e husu nafatin apoiu joven sira hodi mantein pás no estabilidade iha governasaun foun.

Entretantu, Sekretáriu Estadu hosi munisípiu Bobonaro ne’e agradese ba apoiu hosi povu no entidade hotu hosi munisípiu ne’e durante asume kargu iha governasaun da-hitu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here