DILI, (TATOLI) – Prezidente Repúblika, Francisco Guterres Lú Olo, hato’o parabéns ba povu, membru parlamentu nasionál no governu, inklui orgaun soberanu seluk iha ámbitu komemorasaun restaurasaun indepedénsia 20 maiu ba dala 16.

Loron 20 maiu 2002 sei hela iha istória Nasaun nian ba nafatin nu’udar loron ida ne’ebé timoroan sira ho nia determinasaun no sakrifísiu, manan.

“Ha’u hakarak hato’o lia-fuan espesiál; parabéns ba membru Parlamentu Nasionál hothotu ne’ebé mak eleitu iha loron 12 maiu, ha’u agradese no haku’ak mós ba deputadu ne’ebé serbi Nasaun iha Parlamentu Nasionál sesante, durante tinan ida ikus ne’e”, kongratula prezidente Lú-Olo, iha Palásiu Governu, ohin.

“Lori povu no Estadu nia naran ha’u hato’o parabéns ba Primeiru-Ministru no membru governu sétimu konstitusionál nian, hothotu ne’ebé ukun ita-nia rain ho rigorozu, ho kompeténsia no ezemplár durante périodu ida ne’e no lori administrasaun ba susesu hanesan rekuñese husi ita hotu maske hasoru kondisaun ne’ebé susar tebes, la’ós de’it iha nível polítiku maibé mós iha nível orsamentál”, felisita.

Ba membru governu no lejislatura foun ne’ebé sei mai, xefe estadu espera no garante sei hasa’e kualidade ekonomia, promove dezenvolvimentu nasionál atu realiza dezenvolvimentu sustentável.

“Biar governu bele troka malu, maibé serbi interese nasionál, ezije dialógu, konsentrasaun no partisipasaun sidadaun sira nian ho ativu, hanesan luta ba libertasaun nasionál durante 24 anos nia laran, unidade povu nian no unidade entre povu importante hodi harii pás no vitória ba ita-nia indepedénsia”, akresenta.

Deputadu kuarta lejislatura, Méricio Akara, ba jornalista sira iha marjen komemorasaun hateten serimónia ne’e nu’udar momentu reflesaun no reforsa katak importánsia husi reflesaun sira ne’ebé mak oinsá Estadu, governu lori povu ba moris ida prospéru.

Tema ba komemorasaun tinan 16 aniversáriu restaurasaun indepedénsia mak hamutuk hametin unidade, estabilidade no dezenvolvimentu nasionál.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here