Sekretáriu Estadu Juventude no Traballu (SEJT), Nívio Magalhães, ohin fó omenajen ba jornalista Australianu nain lima ne’ebé mate iha Balibo. Foto Tatoli/Agapito dos Santos

BALIBO, (TATOLI) – Sekretáriu Estadu Juventude no Traballu (SEJT), Nívio Magalhães, fó omenajen ba jornalista Australianu nain lima ne’ebé mate iha Balibo bainhira hala’o kna’ar jurnalizmu, kuandu militár Indonézia invade Timor-Leste.

“Ho sira nia kontribuisaun maka mundu hatene kona-ba ita nia prosesu luta ba ukun rasik-án”, hateten Governante ne’e bainhira  sunu lilin ba jornalista nain lima ne’e hodi komemora loron restaurasaun independénsia ba dala-16 iha munisípiu Bobonaro, Postu Administrativu Balibo, ohin.

Jornalista nain lima ne’e mate iha loron 16 fulan-outubru 1975. Nívio hatutan istória nu’udar referénsia ba jerasaun foun atu hatene hodi valoríza eroi sira ne’ebé fó ona vida  ba libertasaun nasionál.

Jornalista sira ne’e mak Tony Stewart moris iha Melbourne Austrália iha loron 20 fulan-abril 1954, Brian Peter moris iha Inglatera loron 17 fulan-fevereiru 1946, Greg Shacleton Brisbane moris iha Austrália loron 28 fulan-agostu 1947, Gary Cunningham moris iha NeWellington Nova Zelándia loron 21 fulan-outobru 1947 no Malcolm Rennie moris iha Neilston Scótlandia loron 9 fulan-marsu 1946.

Entretantu, Partisipa iha seremonia sunu lilin ne’e, Prezidente autoridade munisípiu Bobonaro, Jeferino Soares dos Santos, Komandante PNTL munisipíu, Armando Monteiro, Komandante F-FDTL postu Tunubibi,  administrador postu administrativu, autoridade lokál no seluktán.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here