Prezidente Komisaun Nasionál Eleisaun, Alcino Barris.

DILI, (TATOLI) – Prezidente Komisaun Nasionál ba Eleisaun (CNE-sigla portugés), Alcino Barris, hatete sábadu, (19/5), CNE sei remete (submete) rezultadu provizóriu apuramentu nasionál ba Tribunál Rekursu (TR).

“CNE uza tempu ho di’ak, nune’e aban sei remete rezultadu provizóriu apuramentu nasionál eleisaun antesipada nian ba Tribunál Rekursu atu apresia”, Prezidente CNE ba jornalista sira iha sala apuramentu, Kaikoli, ohin.

Alcino Barris hatutan rezultadu apuramentu eleisaun sei submete ba Tribunál iha loraik maizmenus tuku 16.00 ho balun ho objetivu orgaun judisiáriu bele apresia, valida no públika rezultadu finál apuramentu nian.

Parte seluk, lei eleitorál númeru 9/2017 admite ba partidu polítiku sira ka koligasaun partidaria atu halo reklamasaun ka kontestasaun ba tribunál kuandu la satisfas ho rezultadu apuramentu nasionál iha CNE durante oras 48. Maibé ohin ba loron ida, la iha konkorente sira ka partidu sira atu halo reklamasaun, nune’e aban tempu ikus atu halo reklamasaun.

“Formalmente CNE seidauk simu karta ofisiál ruma kona-ba rejeisaun ba desizaun apuramentu nasionál hosi orgaun eleitorál, se aban sira iha bele halo tanba lei fó dalan”, hateten.

Kuandu partidu polítiku ka koligasaun partidária mak halo kontestasaun, sira tenke iha fundamentu ne’ebé relativa deliberasaun apuramentu nasionál.

Prezidente CNE ne’e afirma CNE konsidera de’it karta formál kuandu rezeita ba rezultadu apuramentu, la’os informál tanba prosedimentu reune kondisaun hotu.

Entretantu, rezultadu provizóriu apuramentu nasionál demonstra partidu koligasaun Aliansa Mudansa ba Progresu (AMP) hetan votu 309.663 (49,6%), partidu Frente Revolusionária Timor-Leste Independente (FRETILIN) ho votu 213.324 (34,2), Partidu Demokrátiku (PD) ho votu 50.370 (8,1%).

Frente Dezenvolvimentu Demokrátiku (FDD) ho votu 34.301 (5,5%), Partidu Esperansa Pátria (PEP) ho votu 5.060 (0,8), partidu Movimentu Dezenvolvimentu Nasionál (MDN) ho votu 4.494 (0,7%), Partidu Repúblikanu (PR) ho votu 4.125 (0,7%), partidu Movimentu Sosiál Demokrata (MSD) ho votu 3.188 (0,5%), nune’e ho totál hamutuk 624.525 (100%).

Nune’e, distribuisaun kadeira ne’ebé konfirmadu partidu AMP hetan kadeira 34, FRETILIN ho kadeira 23, PD hetan kadeira 5 no FDD ho kadeira 3.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here