Servisu Investigasaun Kriminál Nasionál ezekuta mandadu detensaun ba Inspetór Jerál ba Jogu iha ninia servisu fatin Bebora. Foto Tatoli

DILI, (TATOLI) – Servisu Investigasaun Kriminál Nasionál (SIKN), iha tuku 15.00 ezekuta mandatu detensaun ba Inspetór Jerál ba jogu, Agosto Pereira, iha nia servisu fatin, Bebora.

Oras ne’e inspetór submete hela prosesu inkeretu ne’ebé hala’o hosi SIKN tanba diskunfia komete fraúde fiskál, partisipasaun ekonomia no abuzu poder.

Pena ba fraúde fiskál tuir kódigu penál mak kastigu tinan rua to’o neen, dívida ho valór $5000 bele hetan kastigu tinan rua to’o tinan ualu. Abuza poder, ameasa kastigu tinan ida to’o tinan haat.

Enkuantu komete kazu partisipasaun ekonomiku, ameasa hetan pena komarka tinan rua to’o tinan ualu, maibé bainhira hamosu prezuiju ba Estadu ho valór osan $10.000 ba leten bele hetan pena tinan tolu to’o tinan 15.

Agosto Pereira subtitui inspetór sesante, Miquel Lobato, durante fulan tolu resin. SIKN detein bazea mandadu detensaun ho númeru 0041/18.

Jornalista: Manuel Pinto

Editora: Rita Almeida

HAKEREK NO HATÁN

Please enter your comment!
Please enter your name here