Lideransa koligasaun Aliansa Mudansa ba Progresu (AMP) halo konferénsia imprensa iha sede AMP Bairru Grilos, ohin. Foto Egas Cristovão

DILI (TATOLI)—Prezidente Aliansa Mudansa ba Progresu-AMP, Kay Rala Xanana Gusmão husu ba kuadrus, militante, no simpatizante AMP nia tomak atu hakmatek, lalika halo festa tun sa’e ba rezultadu Eleisaun ne’ebé iha, tanba eleisaun la’ós kazamentu.

“Husu nafatin ba kuadrus no militante AMP, tuur hakmatek. Lalika halo festa tun sa’e, tanba buat ne’e la’ós kazamentu. Husu de’it mak ne’e komporta nu’udar sidadaun di’ak, tanba agora mak komesa servisu, la’ós kazamentu hotu ona ita fase bikan. La iha ida halo festa,” Xanana Gusmão apela liuhosi konferénsia imprensa ne’ebé realiza iha sede AMP, bairru Grilos, ohin.

Ba populasaun em jerál, Xanana afirma, partidu CNRT, PLP, no KHUNTO ne’ebé forma AMP sei hala’o saida mak durante kampaíña promete ona ba povu iha komísiu. Kontinua husu, se iha tinan 2023 mak iha partidu seluk manan fali eleisaun, labele dehan katak AMP la halo buat ida.

Programa AMP 2018-2023

  1. Kontinua Asegura Paz No Estabilidade
  2. Hametin Liu-Tan Estadu-Nia Ai-Rin Haat
  3. Hametin Liu-Tan Boa Governasaun No Justisa
  4. Hadi’a Liu-Tan Dezenvolviimentu Humanu (Edukasaun No Saude, Ho Kualidade No Padraun Moris Ida Ás)
  5. Asegura Ekonomia Inkluziva No Sustentável
  6. Hadi’a Liu-Tan Infraestruturas Bázikas No Asegura Dezenvolvimentu Rural
  7. Hakbesik Liu-Tan Servisus Públikus Ba Povu
  8. Kontinua Dignifika Veteranus No Kombatentes Libertasaun, Grupus Vulneráveis No Promove Igualdade De Jéneru No Foin-Sa’e Sira
  9. Presta Atensaun Ba Identidade Kultural Timor-Leste Nian
  10. Kontinua Konsolida Polítika Externa

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here