Padre Martinho G. da Silva Gusmão.

DILI (TATOLI)—Eis Pároku Parókia Manatutu, Pe. Martinho Gusmão sujere di’ak liu konsensu nasionál nune’e asegura labele mosu subsequente eleisaun.

Tuir Amu Martinho katak konsensu nasionál maka bele iha estabilidade governativa atu lori dezenvolvimentu mai rai ida ne’e.

“Bainhira partidu sira ne’e maka lian ida, neon ida no fiar ida, entaun tinan 5 nia laran ita nia polítika hakmatek. Se sira hanoin de’it maka distribuisaun podér, entaun tinan 5 nia laran kontinua moris iha impase polítika,” Padre hato’o kestaun ne’e ba Ajénsia Tatoli iha nia rezidénsia, Dili, tersa ne’e, relasiona ho rezultadu eleisaun antesipada ne’ebé hatudu katak ezije líder nasionál sira tenke serbisu hamutuk.

Nia esplika katak konsensu nasionál ne’e tenke hahú, primeiru, iha plataforma polítika, segundu, iha rekonsiliasaun entre fasaun polítika, terseiru, distribuisaun tarefa no ikus liu maka fó kadeira ba malu.

Tentativu konsensu nasionál bele akontese, Pe. Martinho hatán, ba Maromak buat bele, naran katak lider sira hatene kaer dollar (osan dollar) no lee iha ne’ebá “in God we trust” no hatutan katak se lider sira maka la fiar Maromak no garante de’it ho dollar, sei sakrifika povu no nasaun ba mout saugati deit.

Tuir Amu Martinho katak rezultadu eleisaun antesipada ne’e hatudu katak forsa rua ekilibrada, signifika, bloku ne’ebé manán eleisaun (AMP) sufisiente atu governa, maibé opozisaun mós forsa.

“Ha’u la haree figura ne’ebé maka iha kbiit liu. Agora ne’e depende de’it ona ba Xanana Gusmão no Marí Alkatiri. Se sira na’in rua sente di’ak, governu di’ak. Sira na’in rua sente mal vontade, governu diarreia sa’e,” leigu Igreja Katólika ne’e argumenta.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here