BAUCAU, (TATOLI)-Komunidade suku Tirilolo, Postu Administrativu Baucau Vila, Munisípiu Baucau hein implementasaun programa ho sériu husi partidu polítiku ne’ebé manan eleisaun atu forma governu da-walu hodi garante prosperiedade povu nian no dezenvolvimentu nasionál.

“Partidu ne’ebé mak hetan ukun, tenke dezenvolve nasaun tuir kompromisu, hodi implementa sira-nia programa, hodi hasai povu husi pobreza,” hateten Xefe Aldeia Parlamentu, Manuel Freitas ba Ajénsia TATOLI, ohin.

Freitas hatutan, durante kampaña eleitorál, partidu polítiku sira aprezenta sira-nia programa kona-ba edukasaun, saúde, infraestrutura no seluk tan hodi konvense povu atu hili, hodi reprezenta sira-nia lian iha Parlamentu Nasionál (PN) no ba governasaun tuir mai.

“Tanba ne’e, partidu sira ne’ebé hetan konfiansa husi povu liuhusi rezultadu eleisaun bele implementa duni programa sira ne’e tuir kompromisu eleitorál,” dehan autoridade lokál ne’e.

Nia mós husu ba governu nó mós ba lejizlatura foun mai, tenke tau konsiderasaun hodi aprova lei anti korrupsaun, inklui koluzaun no nepotizmu.

“To’o agora, tuir ita hotu nia observasaun, justisa loloos kona-ba korrupsaun ne’e seidauk la’o di’ak hodi kombate korrupsaun,” hateten xefe aldeia, Manuel Freitas.

Nune’e mós husu bele haree di’ak liután asuntu veteranu ninian, no fó atribuisaun tuir méritu.

“Kuandu veteranu aprova, ema balun ne’ebé la target (alvu), dala ruma balun servisu uluk ba fali ikus, ida ne’e mós presiza haree husi komisaun omenajen sira,” realsa xefe Manuel Freitas.

Inocêncio da Costa Guterres, joven ida espera katak partidu ne’ebé de’it mak sei ukun Timor tomak importante ukun ho fuan no dignidade.

“Partidu polítiku sira ne’ebé de’it mak atu ukun, ukun povu Timor tomak, lakon mós simu ho dignidade tanba ida ne’e tuir povu nia desizaun,” hateten Inocêncio Guterres.

Guteres mós espera partidu polítiku ne’ebé sai vensedór iha eleisaun bele implementa nia programa ho efetivu hodi hadi’a povu no nasaun nia moris.

Kona-ba partisipasasaun eleitór sira, nia kompara, taxa partisipasaun eleitór sira iha Eleisaun Antesipada ne’e másimu no sidadaun sira, feto no mane hatudu sira-nia sivizmu hodi partisipa iha prosesu eleitorál to’o susesu.

“Iha tinan ida ne’e ha’u halo komparasaun ho tinan kotuk liu ba ha’u sente tinan ida ne’e maioria eleitores hotu-hotu tuir másimu liu kompara tinan hirak kotuk,” konklui Alumni Dili Institute of Tecnology (DIT) ne’e.

Partisipasaun eleitór sira iha munisípiu Baucau, liuliu suku Tirilolo alende aldeia Betulale, Lutumutu, aldeia haat seluk hanesan Caisido, Parlamentu, Lialailesu no Osso-wa hamutuk eleitór ne’ebé vota iha sentru votasaun Ensinu Báziku Caisido mak hamutuk votante na’in 1.255.

Husi númeru ne’e votante na’in 1.233 mak ho votus válidu no votu branco hitu, nulu 14 no reklamadu ida.

Partidu polítiku sira, husi votante hirak ne’e atribui votu liuhusi eleisaun, hatudu katak PEP ho votante na’in 13, PD ho votante 83 no PR ho votante walu.

Enkuantu, FRETILIN ho votante 614, MSD ho votante tolu, FDD ho votante 26 no AMP ho votante 478.

Ajénsia TATOLI observa katak durante prosesu eleisaun la’o di’ak no tuir oráriu ne’ebé STAE (Sekretariadu Tékniku Administrasaun Estatál) fó sai. Nune’e mós komunidade ho entuziazmu hodi tuir eleisaun ne’e maski ho kondisaun udan.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here