Direitór Jerál STAE, Acilino Manuel Cabral, bainhira esklarese prosesu hahú eleisaun liuhosi konferénsia imprensa iha Kaikoli, ohin. Foto Tatoli/Rita Almeida

DILI, (TATOLI) – Direitór Jerál Sekretariu Téknika Administrasaun Eleitorál (STAE), Acilino Manuel Branco, husu ba eleitór atu labele tenta vota dala-rua, tanba ne’e konsidera hanesan krime.

Lei kódigu penál iha artigu 237 ne’ebé ko’alia fraude iha votasaun, alinea 1 hatete ema ne’ebé vota maske nia laiha direitu atu vota ka vota fila-fali maski nia vota ona iha aktu eleitorál ne’e sei hetan pena prizaun to’o tinan 3 ka multa.

“Sé mak tenta vota dala-rua ne’e krime, nia tenke asume ninia konsekuénsia”, Acilino ba jornalista sira liuhosi konferénsia imprensa iha STAE Kaikoli, ohin.

Nia konsidera tinta indelével ne’e kualidade no seidauk simu keixa formál ruma kona-ba tinta ne’e laiha kualidade.

Kona-ba tentativa eleitór vota dala-rua ho kualidade hosi tinta ne’e, Acilino esplika katak STAE ninia prosedementu tuir lei mak ema ida-idak tenke vota iha fatin resensiamentu, nune’e mós lista votante sei hetan marka kuandu votante ida ezerse ona direitu votu, ne’e mak mekanismu STAE nian hodi kontrola.

Tanba ne’e, afirma tan laiha dalan para atu komete vota dupla. “Tinta ne’ebe uza tinan ne’e hanesan tinta ne’ebé uza iha tinan kotuk”, tenik. Acilino Branco garante katak tinta ne’e ho kualidade di’ak no sei dura to’o semana ida ka rua.

Nia mós esklarese saida mak akontese iha Baukau katak simu informasaun hosi Diretór STAE Baukau katak loos duni akontese buletin votu 20 resin mak mosu duni foer kikoan, mas la’os buletin votu kuak iha partidu A ou B.

Hosi akontesementu ne’e, ninia parte tau ona marka karimbu kanseladu ba buletin votu hirak ne’e. Nune’e nia husu ba eleitór sira kuandu hetan buletin votu iha sinál ruma bele entrega fila fali ba ofisiál STAE hodi troka ho buletin votu foun.

Nia mós informa ba jornalista sira katak prosesu hahú la’o tuir prosedementu legál katak sentru votasaun hotu iha teritóriu tomak loke tuku 07.00. Oportunidade dahuluk vota ba ofisiál eleitorál sira, delegadu Komisaun Nasionál ba Eleisaun, fiskais, seguransa nomos votante ho idade avansadu.

Kona-ba vota ambulante akontese iha ospital referál sira hanesan RAEOA, Kovalima, Bobonaru, Maubesi, Baukau no Ospitál Nasionál Guido Valadares Bidau Dili. Akontese mós iha prizaun Bekora, Kovalima no Glenu.

Eleitór sira ne’ebé vota ambulante tenke haruka uluk naran ba STAE antes loron 10 eleisaun hahú.

Jornalista: Rita Almeida

HAKEREK NO HATÁN

Please enter your comment!
Please enter your name here