Prezidente PD, Mariano Assanami Sabino, bainhira ezerse ninia direitu votu iha eskola primaria Bairru Pité, ohin. Foto Egas Cristovão

DILI, (TATOLI) – Prezidente Partidu Demokrátiku (PD), Mariano Assanami Sabino, hateten nu’udar lider partidu polítiku respeita tebes saida mak povu deside iha prosesu demokratizasaun ne’e.

“Ita hein povu nia desizaun, agora ha’u nia votu ne’e ba Timor nia hakmatek. Aban ba oin mak partidu sira bele buka malu ko’alia saida mak presiza ita halo”, tenik iha sentru votasaun eskola primária Bairro Pité, ohin.

Bainhira husu kona-ba esperansa partidu jerasaun foun ba formasaun governu, nia dehan nu’udar partidu ne’ebé partisipa iha festa demokrasia, PD respeitu desizaun povu tanba ukun ne’e povu nian, partidu ida labele deside.

“Hein desizaun povu nian no tenke respeitu desizaun, ohin loron povu nian no la’ós polítiku sira nian, tanba ne’e ita hein aban mak polítiku sira foin ko’alia fali ba sa mak povu fó konfiansa”, katak.

Nune’e nia husu ba lider sira hodi hakmatek no kalma tanba festa demokrasia ne’e povu mak ko’alia.

“Aban mak sekuandu povu fó fiar ba partidu se de’it, ita timoroan hotu mak sei buka malu para ko’alia, importante ba Partidu Demokrátiku mak ho votu ida ne’e ita tenke lori rai ba oin no labele tan monu ba eleisaun antesipada”, akresenta.

Nia espera parte komponente ne’ebé partisipa hodi asegura eleisaun bele halo susesu ba festa demokrasia no buat hotu-hotu bele la’o ho di’ak.

Ba sidadaun, nia apela hodi bele ezerse funsaun, se balun seidauk vota bele hakat ba sentru votasaun ne’ebé resensia ba tanba rai ne’e ba oin iha povu nia liman.

“Labele husik ema ida la vota, hela iha uma no la hola parte hola desizaun durante tinan lima, durante tinan lima imi nia votus mak sei transforma ba desizaun, ne’e ita nia rai, ha’u husu de’it nu’udar partidu demokrátiku para ita hotu ba partisipa”, afirma.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here