Ofisial CNE halo konfirmasaun materiál antes halo transportasaun ba sentru votasaun.

DILI, (TATOLI) – Falta loron ida ba Eleisaun Antesipada iha 12 maiu, parte kompetente sira ne’ebé asegura loron ne’e halo ona transportasaun materiál sensitivu no non-sensitivu ba kada sentru votasaun iha munisípiu, inklui Dili.

Adjuntu Admimistradór Dili, Zeca Smith, husu pessoál sira ne’ebé partisipa iha sentru votasaun tenke garante estabilidade iha kada sentru votasaun.

“Ba brigada, fiskais no reprezentante partidu polítiku sira ne’ebé sei partisipa iha sentru votasaun sira hotu tenke kria kondisaun di’ak, brigada no polling staff sira labele sai autór prinsipál barullu no kria situsaun la armonia iha sentru votasaun sira”, tenik bainhira atu halo transportasaun materiál iha sentru votasaun sira iha munisípiu Dili, ohin iha edifísiu Administrasaun Munisípiu Dili.

Autoridade ne’e dehan kna’ar importante ne’ebé mak Estadu no povu fó mak garante eleisaun ho susesu, tanba ne’e tenke iha koordenasaun husi parte hotu.

“Kna’ar PNTL no CNE klaru, ita so husu atu bele iha koordenasaun di’ak iha sentru votasaun desde lansa materiál sensitivu no non sensitivu iha sentru votasaun to’o fali apuramentu nasionál, tanba ne’e ita hotu tenke hamrik hamutuk atu eleisaun la’o ho susesu ka la susesu iha ita hotu-hotu nia liman”, katak.

Smith akresenta ho formasaun ba brigada no fiskais sira hatene ona saida mak sira nia papel.

Parte seluk, komandante PNTL munisípiu Dili, Pedro Belo, husu parte hotu bele tau responsabilidade, ida ne’e la’ós servisu CNE, STAE, PNTL de’it maibé ba ema hotu. 

“Bainhira ita lori materiál sira ba sentru votasaun, husu para hotu-hotu lori responsabilidade, tenke servisu ho ekipa la’os individuál ka instituisaun ida deit”, tenik.

Nune’e nia husu tan, parte ne’ebé partisipa iha sentru votasaun tenke servisu ho imparsialidade ba povu.

Iha biban ne’e partisipa ofisiais, diretór sektorál, administradór postu administrativu, xefe suku no konsellu suku reprezentante partidu polítiku, fiskais, brigadistas, observadór nasionál no internasionál sira.

Diretór STAE Minisípiu Dili, Agustistinho Reis Gomes, hateten transportasaun materiál labele hein to’o seremonia ne’e remata tanba postu administrativu balun dok.

Entretantu dadus resensiamentu iha EA hamutuk 784.286 eleitór husi populasaun 1.183.643 (sensus 2015).

Sentru votasaun iha teritóriu tomak inklui diaspora hamutuk 885 ho estasaun votu 1.160.

Iha Munisípiu iíli totál eleitór hamutuk 167.273 husi populasaun hamutuk 277.279 (sensus 2015), enkuantu sentru votasaun 83 ho estasaun votu 187.

Brigada ba kada sentru votasaun iha ida, purtantu nain 83 no polling staff iha estasaun votu nain ida, nune’e hamutuk 1.870 iha Munisípiu Dili.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here