DILI, (TATOLI) – Partidu Polítiku (ParPol) no Bloku Koligasaun ne’ebé kompete iha sufrájiu parlamentár kompromete sei hakribi violénsia hodi simu rezultadu eleisaun antesipada iha loron 12 maiu tinan ne’e.

Kompromisiu ba dame ne’e hato’o durante seremonia jornada ba pás ne’ebé partisipa hosi Partidu Esperansa da Pátria (PEP), Partidu Demokrátiku (PD), Partidu Repúblikanu (PR), Frente Revolusionária Timor-Leste Independente (FRETILIN).

Bloku koligasaun mak Movimentu Sosiál Demokráta (MSD), Movimentu Dezenvolvimentu Nasionál (MDN), Frente Dezenvolvimentu Demokrátiku (FDD), Aliansa Mudansa ba Progresu (AMP).

Jornada dame ne’e organiza hosi Diozese Dili no hala’o iha Jardin Nossa Señora Imaculada Lecidere, kinta ne’e ho tema “Hamrik ba keta tauk, hamutuk ho Maromak Timor sai Ilha da Paz”.

Reprejentante AMP, Azevedo Marchal, hateten AMP sei kontribui ba pás no hakmatek hodi dezenvolve Nasaun no povu nia moris di’ak.

Matias Boavida reprejenta FRETILIN hateten partidu ne’e maka sai autór ba dame no estabilidade.

Sekretariu Jerál PD, Antonio da Conceição, hateten PD hakarak sai instrumentu ba dame hodi hakribi violénsia ne’ebé sei estraga futuru Nasaun.

Hosi PEP, Ano Gusmão, hateten ninia parte mós hakarak kontribui pás hahú hosi família, sosiadade to’o Nasaun.

João Goncalves hosi MSD hateten dezenvolvimentu atu la’o di’ak presiza pás no estabilidade, tanba ne’e MSD sei fó apoiu ba dame.

Enkuantu, João Saldanha hosi PR no António De Sa Benevides hosi FDD, no MDN reprejenta hosi Francisco Manubui akresenta sei mantein dame no hakmatek.

Jornalista: Agapito dos Santos
Editora: Rita Almeida

HAKEREK NO HATÁN

Please enter your comment!
Please enter your name here