LIAFUAN BADAK HUSI S.E. PREZIDENTE REPÚBLIKA
FRANCISCO GUTERRES LÚ OLO
IHA JORNADA BA PÁS BA ELEISAUN ANTESIPADA
“HAKMATEK BA TIMOR”
NE’EBÉ ORGANIZA HOSI DIOSEZE DILI

Dili, 10 Maiu, 2018

Reverendísimu Bispu Dili nian, D. Virgílio do Carmo da Silva, no autoridade katólika hotu-hotu, inklui autoridade sira denominasaun relijioza seluseluk nian.
Membrus Órgaun Soberania,
Lideres partidus polítikus,
Povu Dili nian.

Ha’u-nia hako’ak boot ba sarani sira no mós ba ema boa vontade no laran-luak hotu-hotu, feto no mane, hosi relijiaun ne’ebé de’it, ne’ebé mak hadomi pás no estabilidade iha rain doben Timor-Leste ne’e no akompaña hela Jornada ba Pás ba Eleisaun Antesipada.
Ha’u-nia hako’ak boot liuliu ba juventude Timor-Leste: joven sira hotu ne’ebé serbisu, no estudante sira hotu hosi ensinu sekundáriu, universidade no instituisaun ensinu superiór. Ha’u hako’ak família sira iha Dili no iha munisípiu sira seluk, ne’ebé halo ona sakrifísiu hodi haruka sira-nia oan ba estuda iha kapitál, nune’e prepara futuru ida ne’ebé di’ak liután ba joven sira no kontribui ba harii nasaun ida ke di’ak liután ba ita hotu.
Ha’u-nia hako’ak boot ba sarani sira hosi parókia hotu-hotu no ema fiar-na’in seluseluk ne’ebé mak mai partisipa iha Jornada ba Pás ida-ne’e organiza hosi Komisaun Justisa no Pás Dioseze Dili nian. Ha’u fó parabens ba sira-nia inisiativa ne’e.
Ikusliu ha’u-nia hako’ak boot ba lider partidu polítiku no koligasaun partidária sira-nian ne’ebé mak sei taru malu iha eleisaun antesipada. Maibé la’ós de’it ba lider sira: ha’u hako’ak mós ativista sira partidu hotu-hotu nian, ne’ebé mak kontribui ba kampaña eleitorál atu la’o di’ak, no mós sira-ne’ebé ho hakmatek no domin fó sira-nia an no partisipa iha moris sosiedade.
Maun-alin no inan-feton sira. Ohin ita moris iha nasaun ida ne’ebé hakmatek. Hafoin sakrifísiu no terus boot mak ita-nia povu hetan pás ho apoiu ne’ebé folin-boot hosi Uma-Kreda. Relijiozu no relijioza sira hosi ita-nia rain sakrifika an, terus, defende no proteje povu, no ko’alia sai injustisa ne’ebé povu enfrenta.
Ita-nia rain lulik ne’e nia na’in mak povu, no Igreja proteje Timór nia oan sira hodi moris tuir ninia valores no prinsípius, no hamutuk ho ita lori pás ba vitória.
Ami iha foho no maioria ita-nia povu iha foho, iha sidade no iha to’os-laran, ho laran tomak rekoñese Igreja nia lala’ok iha konkista ba pás.

Maun-alin no inan-feton sira.
Pás ne’e susar atu konkista, maibé fasil atu lakon. Hanesan uluk ita la’o hamutuk sorisorin durante tinan todan sira okupasaun nian, ohin-loron sosiedade ho Uma-Kreda Timor-Leste kontinua la’o hamutuk nafatin hodi hametin pás no tulun haburas sosiedade ida ne’ebé menus mukit no hakmatek liután ba Timoroan hotu-hotu iha ita-nia rain doben ne’e.
Tansá mak ha’u hato’o ha’u-nia liafuan ne’e ba imi, hodi apela dala ida tan ba Pás ne’ebé konkista tinan 16 liubá?
Funu laiha, la signifka ita moris iha dame nia laran!
Moris ho dame, hanesan moris ho dame iha ita nia an rasik!
Natureza ema nian la fó kualidade hirak mai ita ne’ebé bele dehan perfeitu. Tuir loloos, ema balun hanoin katak sira “umanu” maski sira iha kapasidade atu hatún no haterus ema seluk, nune’e hatudu falta respeitu no hahalok diskriminasaun.
Ita hotu buka tuir sosiedade ida ne’ebé iha Justisa. Maibé laiha pás mak labele iha Justisa. Murak boot liu ne’ebé ita agora bele fó ba nasaun mak hametin Pás. Ita tenke uza Don Pás nian hodi haburas sosiedade no ekonomia, no hadi’ak kondisaun moris Timoroan hotu-hotu nian.
Iha loron Jornada ba Pás ba Eleisaun Antesipada ne’e, ha’u hakarak hato’o rekoñesimentu ba ita-nia Uma-Kreda – no Uma-Kreda nia lala’ok – tanba fó atensaun ba pás no armonia.
Polítika no relijiaun ne’e buat ketak-ketak, maibé iha ita-nia sosiedade – no iha sosiedade barak seluk – polítika no relijiaun fahe lisuk valór domin ba malu ne’ebé ita hotu iha devér atu halo tuir, ne’e katak domin no respeitu ba dignidade maun-alin no inan-feton sira hotu nian.
Ha’u hatete ona katak knaar dirijente ka ukun-na’in hanesan mós vokasaun ida.
Tuir ha’u-nia hanoin, dirijente ka ukun-na’in tenke serbí, hatene sai servidór ba Kauza públika. Tuir loloos, só kuandu ukun-na’in sira kaer metin misaun atu serbí di’ak liután sidadaun sira, mak dignidade ema hotu-hotu nian bele hetan respeitu. Tanba ne’e mak ha’u dehan mós, Estadu nu’udar organizasaun polítika sosiedade ida nian tenke fila oin ba ema. Ema mak tenke sai sentru atensaun ita hotu nian.
Ho respeitu boot ne’ebé mak ha’u sente ba imi hotu, ha’u nu’udar Sarani hakarak dehan ba imi katak, tuir ha’u-nia hanoin, sai Sarani signifika mós moris tuir valór sira sivilizasaun nian: pás, toleránsia no respeitu ba dignidade, tanba ida-ne’e mak lia-tatoli ne’ebé Kristu lori mai ita.
Sua Santidade Amu-Papa Francisco iha selebrasaun Loron Mundiál ba Pás ba dala 50 temi sai ho liafuan badak no umanidade ne’ebé kle’an kona-ba preokupasaun ne’e ne’ebé kona sosiedade nia laran.
Amu-Papa nia liafuan mak ne’e: Ha’u hakarak foka ba la-violénsia nu’udar estilu polítika pás ida no husu boot ba Maromak atu tulun ita hotu fó inspirasaun ba ita-nia laran kona-ba la-violénsia .
Iha nia mensajen, Sua Santidade asegura katak Igreja Katólika sei akompaña tentativa ne’ebé de’it atu harii pás liuhosi la-violénsia ativa no kriativa.
No hatutan: mundu ida ne’ebé livre hosi violénsia hanesan hakat dahuluk ba justisa no Pás.
Iha Timor-Leste, ita-nia esperiénsia, ita-nia istória, tulun ita atu komprende didi’ak liafuan sira-ne’e:
povu, lider sira, ita hotu hatene katak Amu-Papa soi liafuan loos bainhira ko’alia kona-ba la-violénsia.
Liafuan loos ne’e bele sai hanesan matadalan ba ita hotu nia lala’ok iha prosesu harii nasaun ida ke di’ak liután, nakonu ho pás no justisa.

Tanba ne’e mak ha’u husu ba imi hotu, ba lider sira no mós ba povu:
Mai ita hametin pás. Mai ita tane aas nafatin armonia entre Timoroan sira!
Keta husik estraga ita-nia nasaun, ho pretestu ka razaun ne’ebé de’it.
Dala ida tan Presidente Republika hato’o Obrigadu wain ba Amo Bispo D. Basílio do Nasciento, D. Virgílio do Carmo da Silva e D. Norberto do Amaral tanba konvida ha’u atan atu mai partisipa iha Jornada ba Pás, ba Eleisaun Antesipada.
Obrigadu wain ba Komisaun Justisa no Pás diocese Dili nian.
MAI ITA HOTU HAKMATEK BA TIMOR!
Husu boot ba Nai Maromak atu nafatin fó naroman mai ita.

HAKEREK NO HATÁN

Please enter your comment!
Please enter your name here