DILI, (TATOLI) – Prezidente Repúblika, Francisco Guterres Lú Olo no Prezidente Konferénsia Episkopál iha Timor-Leste, Bispo Don Basilio do Nascimento inklui lider igreja protestante padre Lorenço dos Santos, husu povu atu mantein pás no estabilidade durante eleisaun nomós rezultadu.
“Ita tenke sai Don pás nian hodi haburas sosiadade no ekonomia hodi hadi’ kondisaun moris timoroan hotu nian”, apela Lu Olo durante jornada ba dame Iha Jardim Nossa Señora Imaculada Lecidere, kinta ne’e.

Xefe Estadu hateten lider sira tenke sai servidór di’ak ba Nasaun no povu.

“Ukun nain kaer sira nia kna’ar ho dignidade maka bele fó dignidade ba ninia sidadaun”, dehan Lú Olo.

Eis lider rezisténsia ne’e hatutan timoroan hotu tenke tane nafatin armonia no unidade hodi evita violénsia.

Mensajen Bispu Don Basilio do Nascimento ne’ebé lé hosi Padre Leandro Alves husu ba lider parpol hodi simu rezultado manan no lakon iha eleisaun antesipada.

“Se povu Timor-Leste hatene ona demokrasia ho maturidade entaun forsa partidaria no lider partidu politiku ninia maturidade tenke boot liu povu nian”, afirma.

Lider igreja Katólika ne’e mos husu partisipasaun povu atu vota iha sufrajiu.

“Sidadaun ida ho ninia votu pesoál kontribui ba Nasaun nia estabilidade durante tinan lima”, dehan Don Basilio.

Enkuanto, Presidente igreja Protestante iha Timor-Lese, Padre Lourenço dos Santos, husu ba povu atu vota ho konsénsia hodi deside destinu Nasaun.

Jornalista: Agapito dos Santos
Editora: Rita Almeida

HAKEREK NO HATÁN

Please enter your comment!
Please enter your name here