MENSAGEM D. BASÍLIO DO NASCIMENTO
BISPO DE BAUCAU E PRESIDENTE DA COMISSÃO EPISCOPAL TIMORENSE

MENSAGEM BA JORNADA DA PAZ
(ELEIÇÕES ANTECIPADAS 2018)

EXPERIÊNCIA SAI MESTRA BA ITA NIA MORIS

ITA EMA APRENDE BEBEIK BUAT FOUN IHA ITA NIA MORIS. BIAR ESTUDA BARAK NO HALO ESTUDO BO’OT, BIAR HALAO KNAAR MESAK IMPORTANTE NO BO’OT, BIAR NARAN BO’OT NO TUR IHA KADEIRA BO’OT, MAIBE WAINHIRA ITA SEI MORIS, SEI HASORU BEBEIK SITUAÇÃO FOUN, NEBE ITA NUNKA KOKO ULUK. MAIBE MOS, IHA SITUÇÃO NUNEE, MAKA ITA NIA KAKUTAK BUKA HETAN DALAN OI-OIN, ATU HATAN BA DESAFIO FOUN HIRAK NEÉ. TAN NEE MAKA MATENEK NAIN SIRA DEHAN KATAK ITA SEI APRENDE TO’Ó MATE.

DEMOCRACIA, SAI REALIDADE FOUN IDA BA ITA NIACULTURA SOCIAL, USOS E COSTUMES IHA TIMOR-LESTE. ITA NIA ORGANIZAÇÃO SOCIAL TRADICIONAL BASEIA BA REINOS INDEPENDENTES , BIAR MESAK REINO KIIK. TEMPO COLONIAL NO OCUPAÇÃO, PORTUGAL NO INDONÉSIA, LORI SIRA NIA ESTRUTURA SOCIAL MAI, NO HATAMA USOS E COSTUMES BALU IHA ITA NIA ORGAIZAÇÃO SOCIAL; HAMIHIS TIHA ITA NIA ESTRUTURA SOCIAL, HALO ITA DEPENDE BA UKUN NAIN RAI SELUK NIAN.

HAHÚ 2002, ITA MORIS IHA ORGANIZAÇÃO SOCIAL, KA REGIME FOUN IDA ATU UKUN, NARAN DEMOCRACIA; REGIME FOUN IDA NE’E HO NIA ESTRUTURA SIRA, NEBE HANARAN ÓRGÃOS DE SOBERANIA, POVO, ELEIÇÃO, REGRAS DE FUNCIONAMENTO, FOIN HALO PARTE ITA NIA CULTURA TINAN 16 LIU BA.

SITUAÇÃO FOUN IDA LORI NOVIDADE BARAK MAIBE MOS FOTI DESAFIO BARAK. BA ITA, TIMOR-LESTE OAN SIRA NEBE HAKARAK MORIS OHIN TUIR MUNDO MODERNO, SITUAÇÃO FOUN IDA NE’E FOTI DESAFIOS BARAK. TINAN 16 NE’E NIA LARAN HALO ITA KOKO ONA MIDAR NO MORUK BARAK. MAIBÉ REALIDADE NEBE ITA BELE OBSERVA IHA TINA 16 NIA LARAN, MAKA TIMOR-LESTE OAN SIRA HALO CURSO IDA ACELERADO, INTENSIVO, INTELIGENGE E COMPETENTE KONA BA DEMOCRACIA.

IHA TINAN 16 NIA LARAN ITA KOKO ONA SITUAÇÃO SIRA NEBE DEMOCRACIA SIRA RAI SELUK NIAN, BALU TUAN LIU ITA TINAN 200, KOKO TIHA ONA. BALU DEHAN ITA NAÇÃO FRÁGIL, BALU FALI DEHAN FALHADO, BALU FALI DEHAN FUTURO LA IHA, BALU FALI DEHAN BUAT SEL-SELUK TAN. BUAT NEBE ITA BELE DEHAN, NAKDOKO NAKDOKO DUNI, HALIS, HALIS DUNI, MAIBE LADAUK TOHAR NO HEIN KATAK SEI LA TOHAR. SE ITA HOTU HAKARAK, SEI NUNKA TOHAR.

ITA NIA DEMOCRACIA NIA SITUAÇÃO FOUN IDA MAKA ELEIÇÕES ANTECIPADAS. LIAFUAN DEMOCRACIA ITA RONA KOALIA NO HATENE SAIDA MAKA NE’E; LIA FUAN ESTADO MOS ITA RONA KOALIA NO HATENE ONA; NAÇÃO, ÓRGÃOS DE SOBERANIA, PRESIDENTE DA REPÚBLICA, PARLAMENTO, GOVERNO, TRIBUNAL ITA RONA NO HATENE ONA. AGORA ELEIÇÃO ANTECIPADA…. NE’E BUAT FOUN.

FULAN JULHO 2017 ITA HALO ELEIÇÃO BAIBAIN TUIR CONSTITUIÇÃO HARUKA. MAIBÉ ELEIÇÃO IDA NE’E LA FO FUNAN,FUAN NO FININ, TAN GOVERNO LABELE HALAO NIA KNAAR NO NAÇÃO NIA VIDA PÁRA TOMAK. NE’E DUNI, IHA FEVEREIRO 2018, SR. PRESIDENTE DA REPÚBLICA USA NIA COMPETÊNCIA TOMAK HODI DECIDE CONVOCA ELEIÇÃO ANTECIPADA, KATAK BOLU POVO TIMOR-LESTE ATU HILI FALI FORÇA POLÍTICA KA PARTIDO NEBE POVO BELE FO FIAR, HODI BELE UKUN NAÇÃO TIMOR-LESTE DURANTE TINAN 5 MAI NEE.

EMA HARÉ HUSI LIUR DEHAN KATAK TIMOR-LESTE MORIS IHA CRISE. MAIBE, DALA BARAK, CRISE SIRA NEÉ DUNI MAKA MAI FO BIBAN ATU MUDA NO HAFOUN BUAT BARAK IHA EMA NO INSTITUIÇÃO SIRA NIA VIDA HANESAN, NAÇÃO ESTADO, IGREJA, EMPRESAS, INSTITUIÇÕES ETC.ETC.

ELEIÇÃO ANTECIPADA BELE HANORIN SA’A IDA MAI ITA?

1 -ELEIÇÃO ANTECIPADA SAI BIBAN BA ITA ATU APRENDE KATAK WAINHIRA NAÇÃO NIA MORIS LA LAO IHA TINAN IDA NIA LARAN, JULHO 2017 BIBIT TO’O JULHO 2108 OU LIU TAN, INVESTIMENTO LA IHA, OSAN LA IHA, ECONOMIA MOTOK, EMPRESÁRIO SIRA DADA IIS LA DIAK, INVESTIMENTO HUSI LIUR LA TAMA, PEQUENO COMÉRCIO MOUT NENEIK HEIN ATU MATE DEIT, SR. PRESIDENTE DA REPÚBLICA NUDAR ÓRGÃO DE SOBERANIA NEBE BOÓT LIU IHA NAÇÃO NIA LARAN, TAN NIA MAKA KAER NAÇÃO NIA MORI FUKUN, HOLA DECISÃO ATU SOBU PARLAMENTO, HASAI KBIIT HUSI GOVERNO, NO HARUKA HALO FALI ELEIÇÃO IDA, BIAR ITA FOIN HALO ELEIÇÃO TINAN 1 LIU BA.

2 – ELEIÇÃO ANTECIPADA IDA NEÉ, FO BIBAN BA ITA HOTU ATU APRENDE HISTÓRIA FOUN TIMOR-LESTE NIAN LIU DUNI HUSI FUNDADORES SIRA NIA IBUN RASIK. BIAR LADAUK HAKEREK, MAIBE CAMPANHA ELEITORAL IDA NEÉ SAI WE MATAN BO’OT IDA BA ITA NIA HISTÓRIA, OHIN NO ABAN BAIN RUA NIAN. DALA BARAK HO LIU EMOÇÃO DO QUE HO KAKUTAK MALIRIN, IDA-IDAK HAKTUIR SIRA NIA INTERVENÇÃO IHA HISTÓRIA TIMOR-LESTE NIAN. BIAR DALA BARAK POVO LAMENTA KATAK EM VEZ DE APRESENTA PROGRAMA PARTIDS POLITICO HO LÍDERES SIRA KEE MALU FALI IHA EMA HOTU NIA OIN; BIAR NUNE’E, IDA NE’E POSITIVO TEB-TEBES. GERAÇÃO FOUN, TIMOR-LESTE OAN SIRA NEBE LA PARTICIPA WAINHIRA HISTÓRIA FOUN IDA NE’E HAHÚ, NO LA HATENE ACONTECIMENTO SIRA HAHÚ OIN SA,IDA-IDAK RONA HO NIA TILUN, SE MAKA HALO SA’A IDA, NO HALO OIN SA’A. DALA BARAK LIAN LA TUIR MALU NO IBUN LAIS LIU KAKUTAK. MAIBE NUNE’E MOS KANEK BALU BELE HAHÚ HAFITAR –

AN DADAUN.. MAIBE PONTO POSITIVO MAKA GERAÇÃO FOUN LA RONA HISTÓRIA HUSI EMA SELUK NIA IBUN MAIBE RONA DUNI HUSI FUNDADORES SIRA NIA IBUN. BUAT LUBUK IDA MOSU BA EMA HOTU NIA MATAN NO TILUN, HODI FO BIBAN ATU EMA HOTU BELE HATENE NAROMAN NO NAKUKUN FUNDADORES NO PARTICIPANTES HISTÓRIA FOUN TIMOE-LESTE NIAN, NO BELE LORI EMA IDA-IDAK BELE TETU HO NIA SENTIDO CRÍTICO RASIK, NO FACTOS BALU NEBE TOÓ OHIN LORON SAI HANESAN SEGREDO LÚLIK, EMA HO GRUPO BALU NIAN DEIT, OHIN LORON FUNDADOR SIRA DUNI MAKA FO SAI ATU EMA HOTU BELE HATENE. IHA PSICOLOGIA HAHALOK HANESAN NE’E HANARAN CATARSE. IHA ESPIRITUALIDADE ITA BOLU PURIFICAÇÃO.

ITA HATENE KATAK HISTÓRIA SÓ BELE SAI DEIT IMPARCIAL NO OBJECTIVA WAINHIRA AUTORES NO ACTORES DIRECTOS BA ACONTECIMENTO SIRA LAKON HOTU ONA. MAIBE BUAT DIAK MAKA WAINHIRA AUTORES NO ACTORES SIRA MAKA CONTA SIRA NIA HISTÓRIA RASIK, NE’E KATAK SIRA MORIS NO KOKO DUNI BUAT SIRA NEBE SIRA HAKTUIR. NO BIAR WAINHIRA HATUDU LIMAN BA MALU MOS, NE’E HATUDU KATAK IDA-IDAK HATENE IDA SELUK NIA VIDA. HO KOALIA HIRAK NE’E HOTU, GERAÇÃO FOUN APRENDE HISTÓRIA HODI BELE RELATIVIZA EMA NO SIRA NIA HAHALOK, AGORA NO ABAN BAIN RUA.

3 – ELEIÇÃO ANTECIPADA IDA NE’E SAI BIBAN ATU FO HANOIN KATAK POVO IDA NE’E MATENEK TEB-TEBES. TAN, IHA DEIT TINAN 16 NIA LARAN, POVO COMPREENDE POLITICA HO MATURIDADE BO’OT. SE ITA COMPARA CLIMA ELEIÇÃO OHIN NIAN HO TEMPO LIU BA, HARÉ KATAK CLIMA HAKMATEK TEB-TEBES. VIOLÊNCIA BALU NEBE ACONTECE IHA FATIN BALU, NE’E HALO PARTE VIDA, EMOÇÃO NO IRRACIONALIDADE IHA DEMOCRACIA HOT-HOTU. RAI BALU NEBE MORIS IHA DEMOCRACIA KLEUR LIU ONA ITA, SEI BUTI MALU, RAKUT FUUK BA MALU, TUDA CADEIRA BA MALU IHA PARLAMENTO, TOLOK MALU, ETC. ITA NIA SEI USA DEIT KATANA. MAIBE HUSI 2001 TO’ 2018, ITA HARÉ MUDANÇA BO’OT IHA POVO NIA EMOÇÃO. GRAÇAS A DEUS,BIAR NUDAR REALIDADE FOUN,DEMOCRACIA COMEÇA SAI TASAK DADAUN IHA ITA NIA CULTURA SOCIAL.

4 – ELEIÇÃO ANTECIPADA IDA NE’E SAI BIBAN ATU POVO TIMOR-LESTE APRENDE KATAK, GOVERNO IDA SAI FORTE WAINHIRA OPOSIÇÃO MOS FORTE. HEIN KATAK HUSI NEE BA OIN, CONSCIÊNCIA IDA NE’E SAI BO’OT LIU TAN IHA ITA NIA DEMOCRACIA NO CLASSE POLITICA NIA CONSIDERAÇÃO. CAMPANHA ELEITORAL IDA NE’E HATUDU DUNI CONSCIÊNCIA IDA NE’E. TO’O ORAS NE’E LINHA FRONTEIRA IDA NE’E LA DUN CLARO OU LA IHA TAN HOT-HOTU HANOIN KATAK COLABORAÇÃO MAKA ESTRATÉGIA DIAK LIU. MAIBE CAMPANHA ELEITORAL IDA NEE SAI BIBAN ATU HATUDU KATAK SISTEMA NE’E LA DUN EFICAZ. COLABORAÇÃO, MAIBE KALA IDA-IDAK SIKAT HELA TUDIK IHA KOTUK. NEÉ DUNI WAINHIRA SIRA HIRUS MALU IHA CAMPANHA ELEITORAL BUAT LUBUK IDA FAKAR SAI HOTU BA LURON. PROVÉRBIO PORTUGUÊS DEHAN “ZANGAM-SE AS COMADRES DESCOBREM-SE AS VERDADES”. QUANDO UMA LARAN HIRUS MALU, BUAT HOTU MAI LEKAR AN IHA LURON. MAIBE IHA POLITICA ITA HATENE KATAK BUAT NEBE HATETEN OHIN,ABAN BELE NEGA,BUAT NEBE OHIN PARECE LOS ABAN LA LOS ONA,NO HIRUS MALU OHIN ABAN HAKUAK MALU FALI HODI HAN HEMU HAMUTUK. MAIBE SENTE KATAK SIRA NEBE SEI SAI GOVERNO NO OPOSIÇÃO DEFINE DUNI SIRA NIA ÁREA CLARO TEB-TEBES. NUNE’E POVO NO NAÇÃO TIMOR-LESTE MAKA SEI MANAN TOMAK.

5 – ELEIÇÃO ANTECIPADA IDA NEÉ SAI MOS BIBAN IDA ATU FORÇA PARTIDÁRIA NO LÍDERES POLÍTICOS FOUN BALU BELE HAHÚ MOSU IHA CENA POLÍTIC NACIONAL. MOSU HO LINGUAGEM FOUN,CONCEITO FOUN, PROGRAMA ESTRUTURADO, IDEIAS FOUN, DINAMISMO FOUN BIAR OIN BALU SEI NURAK NO BALU OIN TUAN ONA. MAIBÉ IMPORTANTE MAKA SIRA HAHÚ MOSU HANESAN NOVIDADE. BELE USA TERMINOLOGIA BIBLICA KARIK,TO’O ORAS NEÉ, ITA RONA LIU ANTIGO TESTAMENTO HO NIA INTERVENIENTE SIRA. TESTAMENTO FOUN LADAUK HAKEREK. MAIBÉ ITA HAHÚ MORIS DADAUN IHA TEMPO INTERTESTAMENTÁRIO. ENTRE ANTIGO E NOVO TESTAMENTO IHA LE’ET IDA QUASE TINAN 200. IHA TIMOR-LESTE, TEMPO INTERTESTAMENTÁRIO LADAUK NARUK, FOIN MAKA TINAN 2,3 LIU BA NO AGORA MAKA FOIN HATUDU OIN NO LIAN. MAIBE DINAMISMO NE’E HATUDU KATAK POVO TIMOR-LESTE NIA OAN SIRA IHA CAPACIDADE MATENEK ATU APRENDE LAIS.

6 – LORON 12 DE MAIO SAI DASIN IDA HODI TETU BUAT BALU IHA TEMPO ELEIÇÃO ANTECIPADA IDA NE’E:

A) – TETU POVO NIA MATURIDADE POLÍTICA

B) – TETU POVO NIA INTERESSE BA PARTICIPAÇÃO POLÍTICA IHA NAÇÃO NIA MORIS. LÍDER POLÍTICO BALU, HO RAZÃO, HANARAN ELEIÇÃO IDA NE’E HANESAN REFERENDUM

C) – TETU CAPACIDADE LIDER SIRA NIAN ATU HARÉ SE SIRA NIA LIAFUAN, DINAMISMO, IDEIAS, ESTRATÉGIA, MENSAGEM PROVOCA DUNI IMPACTO IHA POVO KA LAE, KONA DUNI BA POVO NIA FUAN, KAKUTAK NO INTERESSE KA LAE.

D) – TETU SE POVO IHA ONA CONSCIÊNCIA KA LAE, KATAK NIA TENKI PARTICIPA IHA NIA NAÇÃO NIA VIDA LIU HUSI NIA VOTO. TO’O ORAS NE’E, PERCENTAGEM ABSTENÇÃO NIAN BO’OT TEB-TEBES; KATAK EMA LA VOTA NE’E BARAK TEB-TEBES. IHA 12 DE MAIO,HO PREGO IDA KA HO LAPISEIRA KA HO AI ATU TUNU SATE KA IKAN, IMPORTANTE MAKA NIA TENKI VOTA ATU HILI FORÇA POLITICA KA LIDER POLITICO NEBE NIA FO FIAR ATU UKUN IHA TINAN 5 MAI NE’E. CIDADÃO IDA-IDAK TENKI HATENE KATAK HO NIA VOTO PESSOAL NIA CONTRIBUI BA NAÇÃO IDA NIA ESTABILIDADE. DURANTE TINAN 5, UKUN NAIN SIRA MAKA UKUN ITA. MAIBE IHA LORON VOTAÇÃO,UKUN NAIN SIRA NIA VIDA POLÍTICA IHA POVO NIA LIMAN.

CIDADÃO KA COMUNIDADE NEBE LA VOTA,DEPOIS LABELE RECLAMA NIA DIREITO BA ESTADO ATU TAU MATAN BA NIA, TAN NIA LA CONTRIBUI BA VIDA POLITICA NO ESTABILIDADE NAÇÃO NIAN.

E) – IKUS LIU,ELEIÇÃO ANTECIPADA IDA NE’E, HANESAN ELEIÇÃO HOT-HOTU, HANORIN KATAK IHA DEMOCRACIA,PODER IHA POVO NIA LIMAN, POVO MAKA MANDA. BIAR NIA LA UKUN, MAIBÉ NIA HILI FORÇA PARTIDÁRIA NO LÍDER SIRA NEBE NIA FO FIAR ATU UKUN.

IHA DEMOCRACIA,POVO NIA DECISÃO IHA CARÁCTER SOBERANO,KATAK NIA MAKA MANDA NO EMA IDA LA DISCUTE POVO NIA DECISÃO. TAN NIA DECISÃO MAKA TODAN LIU. HEIN KATAK FORÇA PARTIDÁRIA NO LÍDER POLÍTICO SIRA HOTU SEI HATENE HAKRU’UK BA POVO NIA DECISÃO.

SE POVO TIMOR-LESTE HATENE ONA MORIS IHA DEMOCRACIA HO MATURIDADE, ENTÃO FORÇA PARTIDÁRIA NO LÍDER POLÍTICO SIRA NIA MATURIDADE POLÍTICA TENKI BO’OT LIU POVO NIAN.

FELICIDADES BA ITA TIMOR-LESTE OAN TOMAK NO BA ITA NIA NAÇÃO

MAIO, 10, 2018 MARCHA DA PAZ

D. BASÍLIO DO NASCIMENTO
BISPO DE BAUCAU E
PRESIDENTE DA CET

HAKEREK NO HATÁN

Please enter your comment!
Please enter your name here