Foto/Google.

DILI, (TATOLI) – Ministériu Planu no Finansas (MPF) ohin halo ona transferénsia viatura Estadu hamutuk 136 ba Ministériu Administrasaun Estatal (MAE), Komisaun Nasionál ba Eleisaun (CNE-sigla iha portugés) no Sekretariadu Tékniku Administrasaun Eleitorál (STAE) hodi apoia iha realizasaun atividade Eleisaun Antesipada (EA) iha 12 maiu 2018.

Diretór Jerál Finansas Estadu, Januario da Gama, hatete MPF liuhusi Diresaun Nasionál Jestaun Patrimóniu Estadu konsege koordena ho ministériu hotu hodi tulun veíkulu sira ne’e ba eleisaun parlamentár ne’ebé kompostu husi unidade 95 entrega ba STAE.

Mobilizasaun no movimentu ba materiál eleisaun nian husi munisípiu ba nivel postu administrativu no sentru votasaun ida-idak, unidade 30 entrega ba MAE hodi ajuda atu transporta eleitór sira liuliu ba estudante no karreta 11 ba CNE hodi sustenta movimentu iha serbisu tékniku nian.

“Iha kontribuisaun no kooperasaun másima husi ministériu sira. Ami apresia ida ne’e, sira sempre fó resposta ida pozitivu tebes to’o lista ne’ebé tama ultrapasa husi númeru ne’ebé ita husu, maibé tanba limitasaun ho nesesidade ba númeru karreta Estadu nian entaun balun ita konsidera hanesan rezerva karik iha nesesidade terrenu balun ita atu halo talves ita bele responde situasaun sira tuirmai”, Januario hatete iha serimónia entrega viatura ba apoia EA 2018 iha Balide, ohin.

Ho transferénsia veíkulu sira ne’e, Januario husu ba MAE, CNE no STAE atubele iha orientasaun ne’ebé klaru ba motorista sira husi kada instituisaun ne’ebé sei lori karreta ne’e atu halo serbisu ida ne’ebé di’ak tanba viatura ne’e pertense ba patrimóniu nasaun nian atu utiliza tuir regra no prosedimentu sira ne’ebé iha para evita reklamasaun husi públiku sobre má utilizasaun iha kampu.

“Karreta rekolla husi ministériu kompleta ho nia kondutór kedan para bele asegura atu utilizadór sira bele kontrola di’ak liután iha terrenu durante períodu eleisaun antesipada nian”.

MPF, Rui Gomes, apresia ba resposta pozitiva ne’ebé hetan husi liña ministeriál hodi responde despaxu Primeiru-Ministru iha 2 abríl liubá atu entrega karreta hodi kontribui ba susesu EA.

“Karreta sira ne’e atu mobiliza urna, materiál sensitivu nomós apoiu ba ita-nia votante sira ne’ebé karik iha difikuldade atu filafali ba sira-nia fatin vota. Ho limitasaun ne’ebé iha ho rejime duodesimál, maibé ita konsege halo kompleta viatura 136”.

Ministru hato’o mensajen ba motorista sira atu konsentra ba buat ne’ebé mak atu halo, deskansa di’ak no labele hemu tua bainhira lori karreta.

Ministru Administrasaun Estatal, Valentim Ximenes, agradese ba kooperasaun husi instituisaun hotu, liuliu ba MPF nia esforsu boot hodi tulun iha véspera eleisaun nian.

“Viatura ne’e fó ba STAE atu transporta materiál sensitivu bá no mai, iha sentru votasaun mai Dili. Apoia ba CNE atu komisáriu sira halo sira-nia observasaun no supervizaun intensa iha territóriu tomak atubele garante transparénsia no apoia viatura atu tula ita-nia estudante ne’e bá de’it, depois filafali ne’e ida-idak mai ona”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here