DILI (TATOLI) – Embaixada Austrália delega ninia membru observadór internasionál no Nasionál na’in 43 ne’ebé hetan akreditasaun ona hodi halo observasaun iha munisípiu Díli, Bobonaru, Lautem, Manufahi no Manatutu iha Eleisaun Antesipada (EA) ne’ebé sei akontese loron 12 Maiu.
Embaixadór Austrália ba Timor-Leste, Peter Doyle sente orgullu haruka misaun observadór atu partisipa iha festa demokrasia ne’ebé sei akontese iha loron hirak tan.
“Ha’u sente orgullu tanba Embaixada Austrália sei hamutuk ho fileiras observadór internasionál no nasionál husi sosiedade sivíl, akademia, komunidade diplomátiku ne’ebé sai testemuña ba demokrasia iha nasaun ne’e”, dehan Peter semana ne’e.
Diplomátiku ne’e dehan tan, mundu internasionál elojiu Timor-Leste tanba hala’o ona eleisaun nasionál ho livre, justu no kredivel la ho asisténsia internasionál ne’ebé mak bot.
“Ha’u dezeju povu Timor-Leste ho buat hotu la’o di’ak iha eleisaun ida ne’e, tan bele jere ho profesionalmente. Ekipa iha Embaixada Austrália hein atu servisu ho Governu foun tuir mai atu hametin liután ami nia kooperasaun”, nia akresenta.
Alende observadór sira hosi Embaixada nian, iha mós ema Australianu besik na’in 100 mak sei mai hosi Austrália atu partisipa iha ekipa observasaun eleisaun nia. Observadór sira ne’e mai husi organizasaun noun govermentál (ONG) oioin no Grupu Amizade Austrália-Timor-Leste.
Partisipasaun observadór sira hatudu interese boot komunidade Austrália ba dezenvolvimentu iha Timor-Leste hanesan interese ida ne’ebé apoia husi koneksaun pesoál no istória ne’ebé fahe ona hanesan viziñu, parseiru no belun ne’ebé besik.
Austrália no Timor-Leste nu’udar parseiru diak iha aréa oioin inklui kooperasaun seguransa no kooperasaun dezenvolvimentu kona-ba edukasaun, saúde, agrikultura, infraestrutura no igualdade jéneru.
Entretantu foin lais Diretór Jerál Sekretáriu Tékniku Administrasaun Eleitorál (STAE), Acilino Manuel Branco informa, órgaun eleitorál ne’e foin mak akredita observadór internasionál na’in rua husi Uniaun Europeia (UE).
Enkuantu iha eleisaun jerál ne’ebé realiza ona iha tinan kotuk, observadór internasionál husi UE iha ema hamutuk na’in 50 to’o 60 mak observa, tanba ne’e nia konsidera partisipasaun observadór internasional iha EA menus.
Buat hirak ne’e akontese, tuir nia tanba observadór internasionál sira la planeia katak Timor-Leste sei akontese EA tanba ne’e difikulta administrativu.
Jornalista: Julia Chatarina
Editór : Manuel Pinto
