Foto espesiál.

DILI, (TATOLI) – Prezidente Komisaun Polítika Nasionál hosi Frente Dezenvolvimentu Demokráriku (FDD), Agustino Gomes, hateten kampaña eleitorál ne’ebé la’o durante fulan ida nia laran, povu Timor-Leste liliu simpatizante sira FDD nian kolabora no kontribui ho di’ak, la iha problema to’o kampaña remata.
“Parabéns ba povu Timor-Leste, joven sira liliu militante sira tomak ne’ebé mantein pás no estabilidade durante períodu kampaña eleitorál”, Prezidente KPN, Agustino Gomes, hosi partidu FDD apela liuhosi konferénsia imprensa iha sede Fomentu, ohin.

Hodi apela tan ba povu tomak katak hela loron hira ka iha 12 maiu, hotu-hotu ezerse direitu votu hodi determina Nasaun no povu nia futuru. Maibé tenke mantein nafatin pás, estabilidade no seguransa hodi fó susesu ba festa demokrásia.

Husu nafatin ba militante sira no kuadru FDD nian inklui sidadaun hotu atu hateten ba malu hodi kontribui votu iha 12 maiu ne’ebé bele hakotu impase polítika durante ne’e ita hasoru.

Parte seluk, Prezidente Orgaun Knua Profesionál (OKP), Alberto de Carvalho, hatutan Timor-Leste marka istória foun eleisaun antesipada ho prezensa FDD ho nia polítika klaru atu dezenvolve Nasaun no hasai povu hosi kiak no mukit enkuantu FDD manan.

Tanba ne’e, FDD kuandu manan Timor-Leste tenke iha kualidade dezenvolvimentu liuhosi área oioin hanesan ekonomia, seguransa, justisa no seluk tan.

Ezisténsia FDD nia plataforma klaru, tanba ne’e husu ba povu tomak hodi hili ho konsiénsia no laran moos.

FDD manan ka lakon la’os sai kestaun maibé nafatin kontribui ba prosesu dezenvolvimentu nasionál.

“FDD simu rezultadu katak manan ka lakon maibé nafatin kontribui ba demokrásia no dezenvolvimentu”, afirma.

Enkuantu, iha konferénsia ne’e, liuhosi grupu unidus no Youth Alive ne’ebé mai hosi estudante sira universitáriu nian ne’ebé hamutuk ema nain 150 ofisialmente deklara apoiu totál ba partidu FDD iha eleisaun antesipada parlamentár.

Entretantu, durante períodu kampaña, FDD mantein nafatin pás no estabilidade iha kampaña eleitorál tanba ne’e agradese ba povu tomak.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here