Prezidente partidu koligasaun Aliansa Mudansa ba Progresu, Kay Rala Xanana Gusmão, iha kampaña eleitorál ne'ebé hala'o iha Gleno, munisípiu Ermera. Foto António Goncalves

DILI, (TATOLI) – Prezidente Aliansa Mudansa ba Progresu (AMP), Kay Rala Xanana Gusmão, hamulak ba matebian no rai lulik Timor-Leste atu apoia AMP hodi garante nafatin pás no estabilidade iha Estadu Repúblika Demokrátika Timor-Leste (RDTL).

“Ha’u lakohi povu atu terus tan nafatin, matebian, rai lulik Timor-Leste, hader ba no mai ba hodi apoia no garante estabilidade Estabilidade Estadu RDTL”, Xanana hamulak iha kampaña ikus AMP nian iha Tasi-Tolu, ohin.

Xanana husu no hamulak nafatin ba matebian sira ne’ebé ruin naklekar no ran nakfakar tan rai ida ne’e nia independénsia, matebian sira hambrik bá, fanu imi hodi hamutuk nafatin ho ami tanba povu Timor-Leste la merese atu terus tan.

“Ami halo “Um Minuto de Silêncio” katak ami bolu imi, hafanu imi tanba povu lakohi terus no susar tan iha tempu independénsia ida ne’e”, dehan Xanana.

Parte seluk Prezidente Komisaun Organizadór, Francisco Kalbuady Lay, hato’o obrigadu no agradese ba apoiante tomak AMP nian, estrutura nasionál to’o baze inklui organizasaun rezisténsia, veteranu sira no partidu sira seluk ne’ebé durante ne’e fó apoia ba prosesu kampaña eleitorál to’o remata.

Entretantu, kampaña eleitorál antesipada hosi partidu AMP nian ohin to’o ona nia rohan iha Tasi-Tolu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here