Laureadu Nobel da Pas, José Ramos Horta

DÍLI, (TATOLI)-Laureadu Nobel da Pas, José Ramos Horta fó hanoin ba partidu hotu ne’ebé sei partisipa iha Eleisaun Antesipada (EA), bainhira manan tenke hatudu nafatin karakter di’ak no haraik aan. Nune’e mós ba militante, simpatizante no apoiante husi partidu sira ida idak.

“Labele tolok ema. Se mak manan tenke hatudu nia karakter di’ak, haraik aan. Agradese ba Maromak, ba povu,” dehan eis-xefe estadu, José Ramos Horta, iha rezidénsia proklamadór Francisco Xavier do Amaral, Bidau-Lecidere, foin lalais ne’e.

Hanesan fundadór partidu FRETILIN, Horta akresenta katak FRETILIN sei la halo persegisaun, diskriminasaun ba ema ida. Maibé buka kolabora malu nafatin, hodi hakribi violénsia.

“FRETILIN manan ‘karik’ la halo diskriminasaun ba elementu AMP (Aliansa Mudansa no Progresu), ne’ebé vota iha AMP iha eleisaun ida ne’e. Ita haree ema di’ak iha AMP kolabora ho FRETILIN, tanba FRETILIN hakarak hakle’an rekonsiliasaun iha rai ida ne’e, hakarak rai ne’e ba oin, lakohi tan violénsia iha rai ida ne’e,” Ramos Horta promete.

“Iha istória; iha tinan atus ba atus, rihun ba rihun, jenerál eh imperadór ne’ebé boot, kuandu nia boot, nia manan funu, maibé nia la halo aat ba funu maluk sira. Nia respeita sira ne’ebé nia derrota iha kampu militár,” apoiante Fretilín ne’e kompara tan

“Polítiku sira mós tenke halo nune’e, se mak manan iha kampu polítiku, manan iha eleisaun hatudu umildade. Ne’e mak ema boot.”

Enkuantu ba partidu ASDT ne’ebé deklara ona atu apoiu Fretilín hodi manan Eleisaun Antisipada, Horta dehan,  “Ita tenke hatudu nafatin respeitu ba avô Nana (Xanana Gusmão-red). Ha’u hateten dala barak, iha aldeia sira ne’ebé ha’u  ba, hateten katak kuandu kalan boot ona, dia 12 Maiu, bainhira CNE fó hatene sai, STAE hatudu sai partidu manan; manan, ita kontente klaru, maibé keta goza fali partidu seluk.”

(Jornalista: Rafy Belo)

(Editór : Manuel Pinto)

HAKEREK NO HATÁN

Please enter your comment!
Please enter your name here