Foto Google.

DILI, (TATOLI) – Diretór Asosiasaun Direitu Umanu no Justisa (HAK-sigla iha lian Indonézia), Manuel Monteiro, hateten prizaun Bekora laiha ona espasu atu akumula dadur sira.

Dadaun ne’e totál kondenadu hamutuk 604. ʺHAK ho nia rede sira sei formula pareser ida para entrega ba governu foun liuhosi ministériu justisa para haree situsaun prizaun nianʺ, dehan Monteiro bainhira organiza semináriu nasionál kona-ba diretu prizioneiru hodi asesu ba justisa formál iha edifísiu Ministériu Justisa Kaikoli, ohin.

Monteiro hatutan tan prizioneiru sira iha direitu ba moris di’ak, saúde, toba fatin, hahan, no edukasaun balun tanba ne’e presiza fó atensaun atu sira bele moris ho dignu.

Direitór ne’e haktuir peskiza HAK nota prizioneiru balun kumpri ona metade no iha diretu hetan liberdade, maibé la akontese tanba defensór sira la halo servisu hodi informa ba tribúnal no Governu hodi hetan indultu hosi Prezidente Repúblika.

Ministra Justisa,  Maria Ángela Carrascalão, hateten tuir lei no konvensaun internasionál garante prizioneiru asesu justisa maske limitasaun liberdade hosi Estadu. ʺLei no konvensaun hotu fó garante katak sira nia diretu la lakonʺ, katak ministra.

Kona-ba, ministra afirma sei koloka balun hafoin guarda prizionál foun sira termina treinamentu iha tempu besik.

“Prizaun Suai di’ak maibé guarda la sufisiente, agora sira remata formasaun professionál sei ba Suai lori tan prizioneiru balunʺ, tenik.

Diretór Nasionál Servisu Prizionais, Ministeriu Justisa, Helder Cosme, hateten totál dadur iha TL hamutuk 719, prizaun Bekora 604, Gleno 95 no Kovalima hamutuk 20.

ʺHosi númeru ne’ebé iha pursentu 76  kondenadu, no 24 preventiva, mane 700 no feto 19, ema estranjeiru 19ʺ, hatutan. Prizioneiros ho idade adultu 680 no joven hamutuk 39 ho tinan 16 to’o 21.

Semináriu ne’e organiza hosi HAK no nia rede sira ho apoiu fundu hosi gabinete sosiadade sivil, Primeiru-Ministru.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here