Prezidente Tribunál Rekursu foun, Deolindo dos Santos bainhira halo intervista ho jornalista sira iha Palásiu Prezidensiál. Foto Tatoli/Antonio Goncalves

DILI (TATOLI)–Prezidente Câmara de Contas atuál Prezidente Tribunál Rekursu (TR), Deolindo dos Santos hateten Tribunál la hapara prosesu auditoria hahú hosi Zona Espesiál Ekonomia Sosiál Merkadu (ZEESM) to’o iha ministériu sira hotu.

“Laiha razaun ida Tribunál bele hapara auditoria. TR ezerse nia funsaun nu’udar Câmara de Contas kumpri de’it Konstituisaun no lei haruka,” Deolindo hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, relasiona ho lider partidu polítiku balun ko’alia iha kampaña katak auditoria ba instituisaun sira Estadu nian paradu tiha ona.

Nia dehan prosesu auditoria sei la’o ba oin nafatin no Tribunál sei foti desizaun tuir tramitasaun prosesuál, katak, bainhira finaliza ona Tribunál sei foti desizaun.

Deolindo esplika prosesu auditoria ne’e diferente ho prosesu baibain, signifika katak ninia tramitasaun ne’e iha.

“La’ós ba ZEESM de’it maibé prosesu ba instituisaun sira seluk mós iha hotu, iha ne’ebé ninia prosesu tramitasaun ne’e la’o hela, no balun iha ona faze kontraditóriu no hafoin faze kontraditóriu sei halo relatóriu finál depois sei notifika ba parte sira ne’ebé Tribunál halo auditoria ba” nia informa.

Nia haklaken auditoria ne’e bazeia ba prosesu sira ne’ebé maka Câmara de Contas aprova iha ninia planu anuál.

Deolindo hatutan Tribunál sei publika relatóriu finál hosi auditoria ne’e ba públiku liuhusi Jornál Repúblika.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here