Foto/Google.

DILI, (TATOLI) – Diretór Jerál Pekuária no Veterinária, Domingos Gusmão, hatete akordu tékniku ne’ebé Governu Timor-Leste liuhusi Ministériu Agrikultura no Peska (MAP) halo ho Ministériu Agrikultura Indonézia fó posibilidade atu nasaun rua ne’e importa no esporta produtu pekuária.

Indonézia hahú importa produtu manu mai nasaun ne’e. “Akordu tékniku ne’ebá ne’e la’ós ba manu de’it, ne’e akordu jerál ba prosesu dezenvolvimentu pekuária nian. Ita mós iha direitu atu halo esportasaun Karau, Bibi ho produtu seluk ne’ebé mak mai husi pekuária, agora sira mós iha direitu para importa mai”, Domingos hatete iha Komoro foin lalais ne’e.

Tanba entrada dahuluk ba produtu manu husi nasaun viziña ne’e tama ona iha abríl husi kompañia PT.Charoen Pokphand liuhusi permisaun téknika husi país rua ne’e maka iha ona posibilidade ba empreza sira ne’ebé hakarak hatama proposta atu halo atividade esporta no importa iha área pekuária.

“Uluk iha ona esportasaun ba karau vaka ho timur bá Indonézia, maibé depois ida ne’e Indonézia bandu tanba laiha akordu tékniku entre nasaun rua ne’e, agora kompañia sira iha direitu para esporta filafali produtu pekuária seluk bá ne’ebá. Ne’e konforme koordenasaun no komunikasaun entre emprezáriu sira. Governu só fasilita, kria sistema para sira halo negósiu ne’e livre, kuandu to’o ona konkordánsia ruma entre empreza sira iha Indonézia ne’e entaun sira hatama proposta, prienxe rekizitu hasai (esporta) karau vaka ka timur”, dehan autoridade ne’e.

Depois akordu tékniku ne’ebé halo, daudaun ne’e seidauk iha proposta ruma husi empreza ne’ebé uluk esporta karau vaka no timur, maibé Governu sei fó sosializasaun ba sira.

“Tempu badak ami sei konvida kompañia sira ne’ebé uluk halo esportasaun depois paradu para tuur hamutuk, husu sira-nia hanoin seráke sei disponivel bele halo ka la’e?”.

Tanba importasaun ba produtu manu foin hahú filafali iha fulan kotuk ne’e no ministériu sei haree hotu tiha hafoin kontinua ba faze tuirmai.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here