Prezidenti KFP, Faustino Cardoso.

DILI, (TATOLI) – Komisaun Funsaun Públika (KFP) ohin hala’o tan jornada la’o tuir ain fatin saudozu Nicolau dos Reis Lobato ba daruak hosi posto administrativu Soibada, munisípiu Manatutu too Manufahi.

Prezidente KFP, Faustino Cardoso, maka lidera ekipa ne’e hamutuk ema 91, komposto hosi instituisaun estadu 20 hanesan Prezidente Repúblika, Gabinete Primeiru-Ministru, reprejentante família saudozu, eskoltu, guarda kosta saudozu, jerasaun hadomi natureza.

“Ohin ami la’o sai hosi Soibada ba Natarbora, Welalulu, Fatuberliu, Alas to’o Same”, dehan Prezidente KFP ba ajénsia Tatoli iha Villa-Verde, ohin.

Durante jornada sei vizita fatin istóriku saudozu durante prosesu luta ba ukun rasik án antes batalla  no mate.

“Pontu sira ne’e uluk saudozu nia ain fatin, ultima jornada antes mate iha batalla iha Tutuluru”, hateten dirijente KFP.

Hasa’e koñesementu servidór públiku kona-ba istória rezisténsia ho difikuldade no dezafiu durante prosesu luta ba ukun rasik án iha tempu ne’eba maka objetivu hosi jornada ne’e.

Alende ne’e kuda no haburas konsénsia serbí ba servidór Estadu ho prinsípiu no valores saudozu nian husik hela.

“Oinsá hametin konsénsia serbí ho valor abnegasaun determinasaun sakrifísiu no patriotizmu ne’ebé husik hela hosi eroi sira”, katak Cardoso.

Objetivu seluk maka hadomi natureza inklui haree besik servisu públiku iha baze hodi atende di’ak liután ba povu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here