DILI, (TATOLI) – Dosente ida no estudante Universidade Nasionál Timor Lorosa’e (UNTL) na’in hitu, lansa livru antalojia literatura ho títulu “Ai-knanoik husi ha’u-nia huun” bilinguál (tetun no portugés) hodi promove literatura iha Timor-Leste (TL).

Livru ne’e kompostu husi istória 21, hakerek husi dosente Maria Cunha no estudante sira hanesan Maria Antónia, Getrudes Gusmão, Bendita do Carmo, Anita Mesquita, Cristina do Carmo, Florentina de Jesus no Emiliano Gomes.

“Literatura ne’e ita-nia beiala sira iha ona. Biar seidauk hakerek, maibé konta hanesan ai-knanoik, konta husi ibun ba ibun, jerasaun ba jerasaun ne’e mak dehan literatura tradisionál”, dehan dosente literatura, Maria da Cunha, ba jornalista sira iha auditoria UNTL, ohin.

Dosente Maria hatutan: “Ne’e rikeza, patrimonia kulturál ida, se ita rasik la dezenvolve, ita lakon, mundu la kuñese, se bainhira literatura iha Timor-Leste ita la fó valór”.

Tanba ne’e hanorin nain ne’e introduz no promove hakerek ba estudante sira atu iha kreatividade hakerek.

“Ami estuda kona-ba área ida ne’e (literatura), ami hatene katak lee testu husi nasaun seluk nian, afinál istória sira ne’e iha valór, ne’e presiza ita konta para ita hotu bele hatene, alunu rasik mós bele hatene”, katak tan.

Dosente ne’e haktuir bainhira sei ki’ik sempre rona ai-knanoik eh istória husi nia aman rasik kona-ba rai, fatin no seluk tan. Saida mak naran Vikeke, Oekusi, Baukau, Aileu no seluk tan ne’e presiza konta para ema hothotu hatene.

Nune’e, iha departamentu língua portugeza la’ós hanorin no aprende eh estuda de’it lian maibé mós aprende literatura orál tradisionál, ko’alia de’it husi ita-nia lia na’in tradisionál eh ansiaun ne’e no literature eskrita. Literatura sai hanesan rikusoin nasaun ida nian, afirma tan.

“Ne’e mak ami fó koñesimentu ba alunu sira, enkoraja buka sira-nia rain rasik hodi tau hamutuk para divulga ba mundu katak Timor-Leste mós iha nia lenda, literatura tradisionál”, realsa.

Dosente ne’e haktuir tan dalaruma alunu sira atu hakerek monografia, teze kona-ba literatura, sira buka hetan barak liu husi ema seluk nian duke ita nian.

Tanba ne’e, hanesan manorin na’in iha departamentu ne’e, dezafia estudante sira hodi aprende, kria rasik, hodi kontribui ba Nasaun. “Tanba literatura tradisionál ne’e patrimóniu, rikeza, konta husi jerasaun ba jerasaun”.

Tuir autóra ba obra “Ai-knanoik husi hau-nia huun” nia haree seidauk iha livru eh obra literatura tanba menus iha ábitu lee ba istória, poema no seluk tan.

“Ita la iha ábitu lee. Alunu sira ikus ne’e lee mak SMS (Short Message Service) maibé la iha ábitu lee literatura”, tenik.

“Ha’u kuandu akompaña TVTL, ha’u rona katak Ministériu Edukasaun haruka estudante ba aprende literatura iha Japaun. Tansa mak ita la aposta ba ita-nia rain, iha mós literatura para dezenvolve. Sira iha koñesimentu, ami-nia estudante iha koñesimentu báziku oinsá dezenvolve literatura”, salienta.

Enkuantu, livru literatura ne’ebé nia hakerek hamutuk ho estudante sira la ho apoiu finanseiru ruma maibé ho vontade rasik.

“Hanesan timoroan sente katak ida ne’e lalika hein, tenke hatudu, ita-nia Na’i ulun sira bele loke matan.  Se ita seidauk hatudu, sira hanoin katak ita seidauk bele”, katak.

Dosente literatura, departamentu lian portugés, Fakuldade Edukasaun, Arte no Umanidade (FEAH), UNTL ne’e afirma literatura divulga ho bilinge tanba sosiedade estudantil seidauk gostu atu lee.

“Ami la iha fasilidade, ami kria atividade hanesan estratéjia atu alunu sira hatene katak literatura ne’e importante, buka lee livru barak para hatene, liuhusi lee bele iha mós inspirasaun ba hakerek”, konta tuir.

“Ita tenke dezenvolve estratéjia mak lori estudante sira halo kreatividade”, nia fó hanoin, iha marjen lansamentu livru ne’e perante profisionál komunikasaun sosiál sira.

Livru ne’e rasik lansa ho inspirasaun no apoiu morál husi profesora brazileira, Marcia V. Cavalcante, no edisaun husi diretór unidade produsaun informasaun no diseminasaun koñesimentu sientífiku, UNTL, Vicente Paulino.

Livru ne’e mós inskritu ho ISBN (International Standar Book Number), 978-989-8915-05-4 no impresaun no akabamentu husi Silvya Printing.

Jornalista: Rafy Belo

Editora: Rita Almeida

1 KOMENTÁRIU

  1. Obrigada ba media Tatoli ba entrevista ne’e. Maibe atu korrije deit buat balu. Livru ne’e mosu hahuu ho inisiativa husi hau -nia belum Professora brasileira Márcia Cavalcante, hafoin nia husu ha’u hodi hamutuk ho nia hodi organiza rezultadu peskiza husi estudante sira. Peskiza hala’o iha munisipiu 13, tuir ida-idak nia moris fatin. Total estudante kuaze atus ida. Barak mak la mai partisipa iha lansamentu tan balu servisu, balu iha li’ur. Na’in hira mak marka prezensa tan sira servisu besik, no balu seidauk gradua.
    Obrigada barak ba Tatoli no belum sira hotu ne’ebe hato’o imi–nia kongratulasaun mai ami, ho ne’e fo korajen mai ami hodi hakat ba nafatin. Obrigada barak .Mária da Cunha

HAKEREK NO HATÁN

Please enter your comment!
Please enter your name here