Bandeira Portugal ho Brasil. Foto ilustrasaun

DILI, (TATOLI) – Nu’udar Klibur Rain Sira ho Dalen Ofisiál Portugés (CPLP-sigla portugés), Portugal ho Brazíl kompremete kontinua apoiu Timor-Leste nu’udar nasaun no povu maun-alin iha aspetu saida de’it bainhira presiza.

Embaixadór Portugal ba Timor-Leste, José Pedro Machado Viera, ba TATOLI ohin iha Arkivu no Múzeu Rezisténsia Timor-Leste (AMRT), iha marjen konferénsia lian portugés, konfiansa no aliansa, katak apoiu Portugal ba TL sempre depende ba vontade governu no Estadu TL.

“Agora ita hakarak hadi’a, konserteza ita hotu hamutuk mellora ita-nia objetivu sira hotu”, akresenta diplomata ne’e iha konferénsia semana lian portugés hodi komemora dalen komunidade luzofóna.

Embaixadór Brazíl iha TL, Aldemo Garcia, haktuir ninia parte ohin loron konsolida hodi haruka profesór brazileiru na’in 50, liuhusi projetu 2010 nian to’o 2015.

“Profesór hirak ne’e ajuda iha konsolidasaun, formasaun ba estudante timoroan sira”, hatutan.

Diplomata ne’e relembra projetu ne’e termina iha 2015, maibé Brazíl iha esperansa hodi retoma fali iha tempu badak.

“Governu (Brazíl) iha komprímisu dezenvolve Timor-Leste, dezde indepedénsia iha projetu kooperasaun oioin hanesan justisa, arkivu nasionál no kontinua komprimísiu hodi ajuda Timor-Leste”, garante nasaun belun CPLP ne’e.

Vise-ministra edukasaun TL, Lurdes Bessa, haktuir marsu fulan kotuk partisipa reuniaun Ministru Edukasaun CPLP nian, oportunidade ko’alia ho Sekretária Nasionál Edukasaun, Brazíl nian hodi retoma fali projetu ne’e iha TL.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here