Xefe Kaza Sivíl Prezidensia Repúblika, Francisco Maria de Vasconselhos, akompanha hosi Xefe Kaza Militar Prezidénsia Repúblika, Koronel Maucalo, liuhusi konferénsia ba imprensa kona-ba desizaun TR ba rekerimentu hosi PDHJ. Imajen Ajensia Tatoli/Xisto Freitas

DILI (TATOLI)–Tribunál Rekursu (TR), iha loron 23 Abríl 2018, liuhusi akordeaun deside katak rekerimentu hosi Provedór Direitus Umanus no Justisa (PDHJ-sigla portugés), Silvério Pinto Baptista, laiha fundamentu.

PDHJ nia rekerimentu ne’e kontra desizaun Prezidente Repúblika (PR), Francisco Guterres Lú Olo, kona-ba disolusaun Parlamentu Nasionál (PN) iha 26 Janeiru 2018 hodi hakat ba iha eleisaun antesipada (EA).

Xefe Kaza Sivíl Prezidénsia Repúblika, Francisco Maria de Vasconselhos, liuhusi konferénsia ba imprensa iha Palásiu Prezidente Nicolau, Bairru Pité, Dili, kuarta ne’e, hateten akordeaun hosi TR hatudu katak Prezidente Repúblika kumpre loloos nia devér tuir Konstituisaun Repúblika artigu 74 no 86 aliña F bainhira foti desizaun disolve Parlamentu Nasionál.

Aleinde ne’e, antes foti desizaun, PR mós rona opiniaun hosi lider partidu polítiku sira ne’ebé hetan asentu iha PN no rona Konsellu Estadu.

Rekerimentu ne’ebé PDHJ hato’o ba TR bazeia ba keixa hosi sidadaun hamutuk ema na’in 16 ne’ebé lamenta ba desizaun PR.

Sidadaun sira ne’e balun ho identidade kompletu no balun lae maka hanesan Leandro de Sena, Milton, Luis da Costa, Duarte V. D. de Jesus, Manuel S., Nelson M., Cassiano Nunes, Nelson F. Gomes, José Eli Ventura, Asis, Atanásio dos Santos, Claudino F. de Jesus, Gaspar Pereira, José de Araújo, Mariano N. da Silva no Melio de Jesus.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here